YouTube видеохостинги ҳам АҚШ президенти аккаунтини камида бир ҳафтага қулфлаб қўйди. Ушбу муддат яна узайтирилиши мумкин, деб хабар берди CNN.

Канал баёнотига кўра, Трампнинг яқинда чиққан видеоси «зўравонликни кучайтириб юборгани» учун тармоқдан ўчирилди.

Лекин ушбу қарор бир ҳафта ўтиб яна қайта кўриб чиқилади. Бундан олдин Twitter, Facebook ва бошқа ижтимоий тармоқлар ҳам АҚШ давлат раҳбари саҳифаларини номаълум муддатга блоклаб қўйгани ҳақида хабар берган эдик. Зўравонликка ундаш борасидаги айблов бунга сабаб қилиб кўрсатилди. 

Шундан сўнг Трамп мазкур чекловларни сўз эркинлигига мисли кўрилмаган зарба деб атади.

Хабарингиз бор, у 6 январь куни Оқ уйда бўлиб ўтган митингда тарафдорларини сайлов натижаларига эътироз билдириш, бунинг учун Капитолийга бориб, «кучсиз республикачиларга ёрдам бериш»га чақирганди. Шундан сўнг намойишчилар конгресс биносига бостириб кириб, Жо Байденнинг сайловдаги ғалабаси тасдиқланган қўшма сессия ишини тўхтатиб қўйганди. 

Конгресс аъзолари эса зудлик билан хавфсиз жойга кўчирилиб, бир неча соат тиқилинчда кутиб туришга мажбур бўлишди. 

Мазкур ҳужум оқибатида беш киши ҳалок бўлди. Демократлар эса вице-президент Майк Пенсдан ўз ҳуқуқидан фойдаланган ҳолда Трампни муддатидан олдин лавозимидан четлатиш таклифини билдиришга ҳамон чақирмоқда. Пенс эса уларнинг даъватини рад этяпти. 

Аммо Демократларда захира режаси ҳам бор. Улар Трампни исён кўтаришга ундашда айблаб, унинг импичменти масаласини Вакиллар палатасига киритишга қарор қилган. Импичмент масаласи бугун кўриб чиқилади.