Фото: Reuters

АҚШнинг амалдаги президенти Жо Байден мамлакатни вайрон қилувчи сиёсат олиб бормоқда. Бу фикрларни АҚШнинг собиқ президенти Дональд Трамп айтиб ўтди.

Кеча, 20 февраль куни сиёсатчи президентлик сайловлари олдидан ўз тарафдорлари билан учрашди. Тадбир давомида у Вашингтонни “нафратланадиган мамлакатлар”ни молиялаш ўрнига Америка чегара хавфсизлигини кучайтириш зарурлигига эътибор қаратди.

“Бу йигит давлатни вайрон қилмоқда”, дея қўшимча қилди Трамп Байден сиёсатини изоҳлар экан.

Бунгача CNN ўз манбаларга таяниб, АҚШнинг амалдаги президенти ўз сайловолди штаб-квартираси аъзоларига ўзидан олдинги президент (Дональд Трамп)ни ақлдан озган, деб кўрсатиш йўлини топишни буюргани ҳақида хабар берган эди. Журналистларга кўра, шу йўл билан Америка раҳбари фуқароларни Трамп мамлакатни бошқаришга нолойиқ эканига ишонтирмоқчи.

Хусусан, Байден ўз ёрдамчиларидан собиқ давлат раҳбарининг ғазаблантирувчи сўзларига эътибор қаратишни талаб қилган. Манбада аниқлик киритилишича, улар жамоатчилик эътиборини Трампнинг “ақлдан озган” нутқларига қаратишлари керак.

Трамп аввалроқ Байденни фашистлар назорат қилаётганини айтган эди.