Зеленский Курск ҳужумининг мақсадини очиқлади

Украина президенти Владимир Зеленский илк бор ҳарбийларнинг 6 август куни Россиянинг Курск вилоятига бостириб киришидан мақсадини айтиб, буфер зона яратиш учун операция зарурлигини таъкидлади.

Украина ҳарбий-ҳаво кучлари қўмондони Николай Олешчукнинг маълум қилишича, ҳарбий-ҳаво кучлари Курск вилоятидаги Сейм дарёси устидаги иккинчи стратегик муҳим кўприкни вайрон қилган.

Россиянинг жанубий Ростов вилояти губернатори Василий Голубевнинг айтишича, Украинанинг учувчисиз самолёти ҳужуми натижасида қулаган қолдиқлар Пролетарск шаҳридаги нефть омборида катта ёнғин келтириб чиқарган. Жабрланганлар ҳақида ҳозирча маълумот йўқ, Украина ҳужумни тан олган.

Россия Мудофаа вазирлиги кучлари эса Украина шарқи ҳисобланган Донеск вилоятидаги Покровск шаҳридан 15 км узоқликда жойлашган Свиридонивка қишлоғини назоратга олганини маълум қилди.

Киевдаги ҳарбий маъмурият Россия жорий ойда Украина пойтахтига учинчи марта баллистик ракета ҳужумини амалга оширганини айтди, бироқ дастлабки маълумотларга кўра, қуроллар яқинлашаётганда уриб туширилган.

Зеленскийнинг сўзларига кўра, Россия ўтган ҳафтада Украина қишлоқлари ва шаҳарларига қарши 40 дан ортиқ ракеталар, 750 та бошқариладиган ҳаво бомбалари ва 200 та учувчисиз учоқларни учирган.

Беларусь президенти Александр Лукашенко Киев Беларусь билан чегарасида 120 мингдан ортиқ аскарни жойлаштирганини, Беларусь ҳарбийларининг учдан бир қисмини чегарага олиб келганини маълум қилди.

Шимолий Корея Украинанинг 6 август куни Россиянинг Курск вилоятига бостириб киришини «террор акти» сифатида қоралади ва ҳар доим Россия билан бирга бўлишини айтди.

Рамзан Қодиров «Cybertruck»да кўриниш берди

Чеченистон раҳбари Рамзан Қодиров Тесла бош директори Илон Маскни мақтаб, қуролли «Cybertruck» ҳайдаётгани акс этган видеони ижтимоий тармоққа жойлаганидан сўнг, уни ўз ватанига таклиф қилди. Қодировни автомобиль устида пулемёт ушлаб ҳолда кўриш мумкин.

«Мен Илон Маскка самимий миннатдорчилигимни билдираман. У, албатта, замонамизнинг энг кучли даҳоси ва мутахассиси. Ажойиб инсон», деган Қодиров. Шунингдек, миллиардерни энг азиз меҳмони сифатида қабул қилишини айтган.

Қодировнинг айтишича, «Cybertruck» Украинадаги урушда қатнашаётган Россия кучларига берилади. «Ишончим комилки, бу машина бизнинг қўшинларимизга кўп фойда келтиради», деб сўзида давом этган.

Инсон ҳуқуқларини поймол қилганлик, жумладан, қийноқлар ва судсиз қотилликларда айбланиб, АҚШ томонидан санкцияга учраган чечен раҳбари автомашинани Маскдан олганини айтди. Аммо Илон Маск Қодировга «Cybertruck» электропикапини совға қилмаганини айтди

«Мени рус генералига «Cybertruck» совға қилади деб ўйлайдиган даражада қолоқмисиз? Бу ҳайратланарли», деб ёзган Илон Маск Х ижтимоий тармоғида.

Автомобиль ҳозирда фақат Шимолий Америка ҳудудларида сотилаётган бўлсада, Маск жорий йил бошида 2025 йилда бошқа бозорлар учун сертификатланиши мумкинлигини маълум қилганди.

Энтони Блинкен яна Исроилда

АҚШ Давлат котиби Энтони Блинкен Исроилга сафари чоғида Ғазо бўйлаб ўт очишни тўхтатишни талаб қилиб, давом этаётган музокаралар асирларни озод қилиш ва сулҳни таъминлаш учун охирги имконият бўлиши мумкинлигини айтди. Келишмовчиликларга қарамай АҚШ дипломатик босимни кучайтирмоқда.

Душанба куни Тел-Авивда Исроил президенти Исаак Герцог билан учрашишдан олдин нутқ сўзлаган АҚШ дипломати Ғазодаги уруш туфайли юзага келган бошқа минтақавий тарангликни ҳам юмшатиш устида ишлаётганини айтди. Блинкен минтақага тўққизинчи сафари чоғида барча учун тинчликка эришиш учун бу охирги имконият бўлишини таъкидлаган.

«Мен президент Байденнинг кўрсатмаси бўйича жадал дипломатик саъй-ҳаракатларнинг бир қисми сифатида бу келишувга эришиш учун келдим. Ҳамма учун »ҳа« ёки »йўқ« дейиш учун ҳеч қандай баҳона изламаслик вақти келди», дея қўшимча қилди Блинкен.

АҚШ ва бошқа Ғарб етакчилари Эрон ҳамда унинг иттифоқчиларини ҲАМАС ва «Ҳизбуллоҳ»нинг юқори мартабали аъзоларининг ўлдирилгани учун қасос сифатида Исроилга қарши кутилаётган ҳужумлардан тийилишга чақирди.

Шунингдек, АҚШ дипломатининг Бинямин Нетаняҳу билан ҳам учрашуви белгилаган. Исроил президенти Герцогга кўра, асирдаги исроилликларни қайтариб олишдан каттароқ мақсади йўқ.

АҚШ, Миср ва Қатар Исроил ва ҲАМАС ўртасидаги бир қатор билвосита музокараларда воситачи бўлиб келмоқда. Музокараларнинг охирги босқичи жума куни Қатарда ниҳоясига етди, аммо ҳеч қандай ечим топилмади. Жараён бу ҳафта Мисрнинг Қоҳира шаҳрида яна давом этиши кутилмоқда.

Ғазода бутун соғлиқни сақлаш сектори қулаган — Фаластинлик шифокор

Дайр ал-Балаҳдаги Ал-Ақсо касалхонаси матбуот котиби доктор Халил ал-Дегран билан суҳбатлашди. Унинг айтишича, Исроил кучлари тинч аҳоли пунктларида қолаётган аҳолини нишонга олишда ва зарба беришда давом этмоқда.

«Кеча Исроил расмий кучлари турар-жой биносини нишонга олди. Ушбу бинода бир оиланинг етти нафар аъзоси олти фарзанд ва уларнинг онаси ҳалок бўлган», деди у.

Унинг сўзларига кўра, қамал остидаги анклавда 25 та касалхона ишламаяпти. Рафаҳнинг Миср билан чегара пункти 200 кундан кўпроқ вақт давомида ёпилганлиги сабабли касалхонада тиббий буюмларнинг тақчиллиги кузатилмоқда.

Касалхона ходимлари жароҳатланган беморларни энг асосий тиббий эҳтиёжлар билан таъминлай олмаяпти. Бу ҳудудда соғлиқни сақлаш тизими қулаганлигини англатади.

Ал-Дегранга кўра, Исроил кучларининг Фаластин аҳолисини геноцид ва этник тозалашни амалга ошириш нияти аниқ.

Ҳудуддаги заиф беморлар ва чақалоқлар юқори даражадаги тиббий ёрдамга муҳтож. Ал-Ақсо касалхонаси ҳам ишдан чиқадиган бўлса, бир миллиондан ортиқ фаластинлик зарур тиббий ёрдамдан маҳрум бўлиб қолади.