Axios: АҚШ ва Эрон вакиллари тўғридан-тўғри алоқаларни қайта тиклади
Эрон Ташқи ишлар вазири Аббос Ароқчи ва АҚШ етакчисининг махсус вакили Стив Уиткофф сўнгги кунларда тўғридан-тўғри алоқаларни қайта тиклади, деб даъво қилмоқда Axios портали.
«Сўнгги бир неча кун ичида Ароқчи ва Уиткофф ўртасида тўғридан-тўғри алоқа канали яна ишга тушди. Улар алмашган хабарлар қанчалик мазмунли бўлгани ҳозирча номаълум, бироқ бу тахминан икки ҳафта олдин бошланган урушдан кейин томонлар ўртасидаги илк маълум бўлган алоқадир», — дейилади хабарда.
Портал суҳбатдошларининг сўзларига кўра, Ароқчи Уиткоффга урушни тўхтатишга эътибор қаратилган матнли хабарлар юборган.
Манбалардан бирининг таъкидлашича, АҚШ Эроннинг репарация (товон пули) тўлаш ҳақидаги талабларини рад этмоқда. Вашингтон маъмурияти Эрон билан республиканинг жаҳон ҳамжамиятига интеграциялашишига ва ўз нефтидан пул ишлаб топишига имкон берадиган келишув тузишга тайёр экани айтилмоқда.
Аввалроқ АҚШ Президенти Дональд Трамп Теҳрон ва Вашингтон мулоқотни давом эттираётганини баён қилган эди. У, шунингдек, Эрон томони келишувга интилаётганини даъво қилган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг