Фото: todayuknews.com

АҚШ президенти Жо Байден маъмурияти Украина президенти Владимир Зеленскийни Россия 48 соат ичида республикага кенг кўламли бостириб киришга тайёрланаётгани ҳақида хабардор қилди, дея ёзмоқда "Newsweek" АҚШ разведка хизмати вакилларига таяниб.

«Украина президенти АҚШ разведкаси маълумотларига кўра, Россия 48 соат ичида босқинни бошлаши мумкинлиги ҳақида огоҳлантирилди», дейди АҚШ расмийларидан бири.

АҚШ маълумотларига кўра, бугун Россия разведкачи самолёти Украина ҳаво ҳудудини бузган. Буни Зеленский маъмуриятига яқин манба тасдиқлади. Нашр суҳбатдошининг қўшимча қилишича, бу бир ой ичида учинчи шундай қоидабузарлик ҳисобланади.

"Newsweek" нашрига бошқа манбанинг айтишича, Россия ўзини ўзи эълон қилган Донецк халқ республикаси (ДХР) ва Луганск халқ республикаси (ЛХР) ҳудудига қўшин киритишни режалаштирмоқда. Бундан ташқари, Москва гўёки Киевга жиддий зарба бериш ниятида. Нашрнинг бошқа манбасига кўра, бу ҳолатда операция киберҳужумлардан бошланади. Бунинг ортидан тунга режалаштирилган қуруқлик ҳужуми бошланади.

21 февраль куни Россия президенти Владимир Путин ДХР ва ЛХР суверенитети тан олинишини эълон қилди. У тегишли фармонларни, шунингдек, ҳар икки республика билан дўстлик, ҳамкорлик ва ўзаро ёрдам тўғрисидаги шартномаларни ратификация қилиш тўғрисидаги федерал ҳужжатларни имзолади. Ҳужжатларга мувофиқ, Россия ДХР ва ЛХР суверенитети ва ҳудудий яхлитлигини ҳимоя қилишга ёрдам беради, бу ҳудудларда тинчликка таҳдидни бартараф этиш ва босқинчилик ҳаракатларига қарши курашиш учун барча мавжуд чораларни кўради, деди президентнинг расмий вакили, мудофаа вазири ўринбосари Николай Панков. 

22 февраль куни Путин Федерация Кенгашидан Россия Қуролли Кучларидан хорижда фойдаланишга рухсат олди. Парламент юқори палатаси раиси Валентина Матвиенко Россия тинчликпарвар кучлари Донбассга юборилиши мумкинлигини қайд этди. Ўз навбатида, ДХР раҳбари Денис Пушилин ҳозирча республикада россиялик ҳарбийлар йўқлигини айтди.