Фото: Reuters

АҚШ Сенатидаги демократлар Украинасиз Исроилга ёрдам бериш ҳақидаги қонун лойиҳасини маъқуллашмади.

Манбага кўра, 7 ноябрь, сешанба куни демократлар республикачиларнинг Исроилга фавқулодда ёрдам кўрсатиш тўғрисидаги қонун лойиҳасини тезда маъқуллаш уринишига қарши чиққан. Ушбу ҳужжатда Украинага ёрдам кўрсатиш кўзда тутилмаган. Қонун лойиҳаси ўтган ҳафта Вакиллар палатаси томонидан қабул қилинганди.

Ҳужжатга қарши чиққан демократлар фақат Исроилга эмас, Украинага ҳам ёрдам бериш тарафдори эканликларини билдиришди.

Сенаторлар қўшимча молиялаштириш учун ўз қонун лойиҳасини тайёрлаётганликларини ва уни шу ҳафтада киритишга умид қилишларини маълум қилишди.

Шу йилнинг 3 ноябрь куни АҚШ Конгресси Вакиллар палатаси Украинани тилга олмаган ҳолда Исроилга ёрдам кўрсатиш бўйича алоҳида қонун лойиҳасини маъқуллаганди. Овоз беришда 226 конгрессмен ҳужжатни ёқлаб чиқди, 196 нафари эса қарши чиқди.

Аввалроқ, АҚШ Конгресси Украинага кўмаксиз фақат Исроилга ёрдам бериш тўғрисидаги қонун лойиҳасини қабул қилса, АҚШ президенти Жо Байден вето ҳуқуқидан фойдаланиши маълум бўлган эди. Бу ҳақда Оқ уй Миллий хавфсизлик кенгашининг стратегик алоқалар бўйича координатори Жон Кирби маълум қилганди.