Фото: Reuters

«АҚШ иттифоқчилари ва шериклари билан 2022 йилда Пекинда ўтказиладиган қишки Олимпиада ўйинларини биргаликда бойкот қилиш масаласини муҳокама қилмоқда».

Ушбу маълумотлар АҚШ Давлат департаменти матбуот котиби Нед Прайснинг журналистлар билан учрашувидан кейин тарқалиб кетди. Кейинроқ АҚШ дипломатик вакили бу баёнотни рад этди.

Брифингда журналистлардан бири Нед Прайсдан АҚШ ўз иттифоқчилари билан қандайдир маслаҳатлашувлар ўтказаётгани, Пекин Олимпиадасини қўшма бойкот қилиш масаласини муҳокама қилинаётгани ҳақида сўраган.

Унга жавобан Прайс «Бу биз, албатта, муҳокама қилишни истаймиз, келишилган ёндашув нафақат бизнинг манфаатларимизга, балки иттифоқчиларимиз ва шерикларимиз манфаатларига ҳам хизмат қилишини тушунамиз. Шунинг учун бу ҳозир ҳам, келажакда ҳам кун тартибидаги долзарб масалалардан бири", деган

Унинг таъкидлашича, бир қатор Ғарб давлатлари «Шинжонда (ХХРнинг Шинжон-Уйғур автоном вилояти) содир этилган ваҳшийлик учун масъул бўлганларга қарши» санкциялар қўллаган.

«Демак, биз ушбу барча долзарб масалалар бўйича ишларни мувофиқлаштираётганимиз аниқ ва, албатта, Пекин Олимпиадаси биз муҳокама қилишни давом этадиган мавзудир», дея қўшимча қилган Прайс.

Кейинчалик, АҚШ Давлат департаментининг исми ошкор қилинмаган вакили матбуот котибининг ушбу баёнотини рад этди.

«Бизнинг 2022 йилги Олимпия ўйинларидаги позициямиз ўзгармади. Биз иттифоқчилар ва шериклар билан қандайдир қўшма бойкот масаласини муҳокама қилмадик ва муҳокама қилмаяпмиз ҳам», дея мулозимнинг сўзларини келтиради «Politico» нашри.