Фото: Reuters

АҚШ президенти Жо Байден оралиқ Конгресс сайловларида Республикачилар партияси ғалаба қозонса, унга импичмент эълон қилишини тан олди. Америка етакчиси бу ҳақда Сан-Диего шаҳрида  бўлиб ўтган демократлар митингида айтди. Сайловлар 8 ноябрь куни бўлиб ўтади.

"Улар менга агар [Республикачилар] Вакиллар палатаси ва Сенатни қайтариб олсалар, менга импичмент эълон қилишларини айтишган. Аммо нима учун мени импичмент қилишларини билмайман", деди Байден.

Август ойи охирида "The Hill" газетаси республикачилар ноябрь ойида АҚШ оралиқ сайловларидан кейин Байденга импичмент эълон қилишни режалаштираётгани ҳақида хабар берди. Материал муаллифларининг таъкидлашича, бир қатор консерваторлар президентга қарши импичмент моддаларини жорий Конгрессга тақдим этишган. Улар Байденни чегара назорати, коронавирус пандемияси ва АҚШ қўшинларининг Афғонистондан олиб чиқиб кетилиши каби қатор масалаларга ёндашувида "оғир жиноятлар" содир этганликда айбламоқда.

АҚШ Конгресси Вакиллар палатасининг республикачи аъзоси Маржори Тейлор Грин аллақачон АҚШнинг собиқ президенти Дональд Трампнинг уйида тинтув ўтказилгани сабабли Байденга импичмент эълон қилишга чақирган эди. Республикачи сенатор Тед Круз бир вақтнинг ўзида Байденнинг импичменти учун "кўп асослар" бўлишини доимий равишда таъкидлайди.