27 июль куни Франция пойтахтида бўлиб ўтаётган Олимпиада ўйинларида қатнашадиган ўзбекистонлик спортчилар рўйхати маълум бўлди.

Ушбу баҳслар телеканалларда соат 13:00 дан кейин эфирга узатила бошлайди. Бу вақтда Достон Рўзиев ва Ҳалимажон Қурбонова дзюдо бўйича татамига чиқишади.

13:15 дан бошлаб Анна Пракатень иштирокидаги академик эшкак эшиш бўйича мусобақалар бошланади. Анастасия Зелинская эса 14:12 да сузиш баҳсларида курашга қўшилиши, айни шу спорт турида қатнашаётган юртдошимиз Иля Сибирцев эса 14:45 да баҳсларга киришиши маълум бўлган.

Велоспорт спорт тури бўйича 17:30 дан бошлаб Ольга Забелинскаяни кўришимиз мумкин бўлади. Ўзбек боксининг ёрқин вакилаларидан ҳисобланган Нигина Ўктамова эса кечки дастурларда рингга кўтарилади. Дастлабки маълумотларга қараганда 19:00 да мисрлик Йомна Аядга қарши жанг қилади.

Биринчи турдаги мағлубиятдан сўнг ҳар бир ўйинни финалга айлантиришга ваъда бераётган Ўзбекистон Олимпиа терма жамоаси 20:00 да Миср билан куч синашади.

Кунни ўзбек спорт гимнастикаси усталари якунлаб беради. 23:00 дан бошланадиган баҳсларда Расулжон Абдураҳмонов, Хабибулло Эргашев ва Абдулло Азимов иштирок этиши режалаштирилган.

«Халқ сўзи» спортчиларимизга муваффақият тилайди.