Soʻnggi yillarda Samarqand viloyati va Tojikiston hududlari oʻrtasidagi koʻp qirrali hamkorlik sifat jihatidan yangi bosqichga koʻtarildi. Bu ikki tomonlama munosabatlarning yaxshi qoʻshnichilik va oʻzaro manfaatli xususiyatini aks ettiradi.

Viloyat investitsiya, savdo va sanoat boshqarmasi maʼlumotlariga koʻra, bugungi kunda Samarqand viloyatida Tojikiston kapitali ishtirokidagi 19 ta korxona faoliyat yuritmoqda, ulardan 15 tasi toʻliq qardosh respublika ishbilarmonlarining investitsiyalari hisobiga tashkil etilgan. Hozirda birgina Samarqand shahrida VERUM MENSURA MCHJ, GOLD SAMARKAND OIL MCHJ, BAROKATONA MCHJ, SOFIA KIDS MCHJ va boshqa kompaniyalar muvaffaqiyatli faoliyat yuritmoqda.

— 2025-yil oxiriga kelib, Samarqand viloyati va Tojikiston hududlari oʻrtasidagi savdo aylanmasi 50 million dollardan oshdi, — deydi Samarqand viloyat investitsiya, savdo va sanoat boshqarmasi boshligʻi Madaminbek Nurullayev. — Qoʻshni respublikaga qariyb 47 million dollarlik mahsulot eksport qilindi, import esa taxminan 4 million dollarni tashkil etdi. Samarqand viloyati korxonalari Tojikiston Respublikasiga metall buyumlar, maishiy texnika, ipak, toʻqimachilik va sintetik mahsulotlar yetkazib beradi.

Ikki mamlakat aholisi respublikalar oʻrtasida biznes, turizm va shaxsiy maqsadlar uchun faol sayohat qilishadi. Masalan, Samarqand viloyati-Tojikiston chegarasidagi Jartepa chegara bojxona postida oʻtgan yili 135 mingdan ortiq transport vositalari harakati qayd etilgan. Ushbu chegaradan oʻtgan ikki mamlakat fuqarolari soni 140 mingdan oshdi.

Samarqand davlat universitetida tojik filologiyasi fakulteti mavjud. Qardosh respublika koʻmagida 2024-yilda universitetda zamonaviy ofis uskunalari bilan jihozlangan tojik tili, madaniyati va adabiyoti markazi ochilgan. Tojik tilida soʻzlashuvchi aholi zich joylashgan hududlarda joylashgan umumtaʼlim maktablarida ona tilida dars beradigan sinflar ochilgan.

Samarqand viloyatida 30-yildan ortiq vaqtdan beri tojik tilida haftalik “Ovozi Samarqand” gazetasi nashr etilmoqda. Mahalliy yozuvchi va shoirlarning kitoblari buyuk Rudakiy tilida muntazam ravishda nashr etiladi. Olimlar va ijodkorlar oʻrtasida uzoq yillik ijodiy aloqalar oʻrnatilgan. Tojikiston Respublikasi va samarqandlik yozuvchilar bilan hamkorlikda muntazam ravishda qoʻshma ijodiy kechalar va seminarlar oʻtkazib borilmoqda.

Abdulaziz YOʻLDOSHEV, “Xalq soʻzi”.