Vatan bayrog'i
VATAN BAYROGʻI
Polvonlar bellashib bahs maydonida
Shohsupada magʻrur qad kergan chogʻi,–
Vatan madhi yangrab gʻolib shaʼniga,
Bosh uzra yuksalar shu yurt bayrogʻi.
El-yurt taqdiriga doxil arboblar
Bir fikrga kelgach anjuman qurib,
Qoʻl berib ahd etar mudom har bobda,
Vatan bayrogʻining yonida turib.
Onadan dunyoga kelib, oqibat
Vatan tuprogʻiga ketar har bashar.
Vatan bayrogʻiyu ona roʻmoli
Bosh uzra hilpirab tursa yarashar.
Shunday bir odat bor: otlanar ekan
Vatanni himoya etmoqqa agar,
Otayu onasin duosidan soʻng
Yurt bayrogʻin oʻpar askar yigitlar.
Qalam ham yurt tinchligi himoyasida
Askar qurolidan aslo emas kam.
Shu bois tiz choʻkib, chin ixlos ila
Yurtim bayrogʻini oʻpaman men ham
Zarang ogʻochidan uning dastasi,
Matosi oʻzbegim oridan bunyod.
O, yurtim bayrogʻi, koʻnglim nashʼasi,
Hilpirab porlayver turgancha dunyo!
Saʼdulla HAKIM.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring