Uch nafar senatorda koronavirus aniqlandi
AQSH kongressi senatining milliy xavfsizlik va hukumat ishlari boʻyicha qoʻmitasi raisi Ron Jonson oxirgi ikki kunda koronavirusga chalingan uchinchi senator boʻldi. Bu haqda Fox News xabar berdi.
Jonson 29-sentyabr kuni keyinchalik Covid-19 aniqlangan odam bilan muloqotda boʻlgan. Buni bilishi bilan u test topshirgan va natija musbat chiqqan.
Ayni paytda senator oʻzini yaxshi his qilmoqda.
Uning koʻpchilik yordamchilari masofadan ishlab kelayotgani va oʻzaro muloqotda boʻlmagani ham maʼlum qilindi.
Eslatib oʻtamiz, 2-oktyabr kuni AQSH prezidenti Donald Tramp va uning rafiqasida kovid aniqlangan edi. Shundan soʻng Oq uy rahbarini Uolter Rid nomidagi harbiy tibbiy gospitalga oʻtkazishdi. U aholiga videomurojaat yoʻllab, oʻzini yaxshi his etayotganini bildirgan.
Aynan shu kuni ikki senator — Tom Tillis va Mayk Li ham koronavirus bilan kasallangani haqida xabar berildi.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring