Toshkentda yilning birinchi kunida mast haydovchi YTH sodir etgani oqibatida toʻrt nafar bola tan jarohati oldi. Ikki katta yoshli odam va haydovchi ham jarohatlangan.

Shahar IIB xabariga koʻra, soat 17:15 atrofida Yashnobod tumani Maxtumquli koʻchasi boʻylab 54 yoshli fuqaro “Matiz” rusumli avtomashinani ishonchnoma bilan boshqarib yurgan.

Haydovchi mast holatda boʻlgan va shu sababli nazoratni yoʻqotgan. Natijada “Matiz” ikkita “Nexia-2” rusumli avtomashinaga borib urilgan.

Hodisa oqibatida yetti kishi, jumladan, toʻrt nafar bola jarohatlangan. “Nexia-2” haydovchisi bosh suyagining yopiq sinishi, chap boldir suyagining yopiq sinishi, oyoqning yopiq sinishi bilan kaalxonaga yotqizildi.

7-sinf oʻquvchisi 12 yoshli Z.T. bosh suyagining yopiq jarohati bilan shifoxonaga yetkazilgan. 2-sinf oʻquvchisi 9 yoshli F.K.ning old qismi terisi kesilib, boshi yopiq jarohatlangan. 4 yoshli I.K. boshining yuqori qismidagi yirtilgan yara, yopiq bosh jarohati, chap oyogʻi fibulasining yopiq sinishi bilan yotqizilgan.

34 yoshli yoʻlovchi F.K. chap oyogʻining ochiq sinishi bilan ogʻrigan, bir yoshga ham toʻlmagan chaqaloq travmatik shokni boshdan kechirgan.

“Matiz” rusumli avtomashina haydovchisi ham kasalxonaga yotqizilgan. Unga yopiq kranioserebral shikastlanish, oʻng oyoq suyagining siljishi bilan ochiq sinish, alkogolli mastlik tashxisi qoʻyilgan.

Toshkent shahar IIBB huzuridagi Tergov boshqarmasi tomonidan Jinoyat kodeksining 266-moddasi 1-qismi boʻyicha (transport vositasini boshqarayotgan shaxs tomonidan yoʻl harakati yoki transport vositasidan foydalanish qoidalarini buzish, natijada badanga ogʻir shikast yetkazish) ish ochilgan. Hodisa yuzasidan tergov harakatlari olib borilmoqda.