Poytaxtimizda “Uzbek Jewellery Fair-2023» birinchi Xalqaro zamonaviy asbob-uskunalar, texnologiyalar va zargarlik buyumlari koʻrgazma-savdosi boshlandi. Unda mamlakatimiz va jahonning yetakchi zargarlik buyumlari ishlab chiqaruvchilari, ulgurji va chakana savdo tarmoqlari vakillari, Italiya, Saudiya Arabistoni, Turkiya kabi 10 dan ortiq davlatdan zargarlik buyumlarini import va eksport qilish boʻyicha xizmatlar koʻrsatuvchi logistika kompaniyalari ishtirok etmoqda.

Tadbirni investitsiyalar, sanoat va savdo vazirining oʻrinbosari Xurram Teshaboyev kirish soʻzi bilan ochar ekan, soʻnggi yillarda mamlakatimizda zargarlik yoʻnalishini rivojlantirish, sohani muhim tarmoqlardan biriga aylantirishga qaratilgan tizimli chora-tadbirlar amalga oshirilayotganini taʼkidladi.

Jumladan, mustahkam huquqiy baza yaratildi, qiymatining 15 foizini oldindan toʻlash va toʻlovni 180 kunga kechiktirish sharti bilan qimmatbaho metallarni tovar-xom ashyo birjasi orqali sotishga ruxsat etildi. Shuningdek, sanoatda ishlab chiqarish korxonalari soni 2017-yilga nisbatan 4,2 barobarga oshib, 448 taga, tarmoqda band boʻlganlar soni esa 4,5 ming kishiga yetdi. Zargarlik sohasida “Sofizar”, “Gavhar Jewel Group”, “Fonon” kabi yangi ishlab chiqarish korxonalari tashkil etildi.

Eksponatlari keng maydonda namoyish etilayotgan koʻrgazma sanoatning ulkan salohiyatini aks ettirish imkonini berdi. Ishtirokchilar stendlarida kumush, oltin, boshqa qimmatbaho metallar va toshlardan yasalgan turli zargarlik buyumlari, qimmatbaho taqinchoqlar, modali aksessuarlar, soatlar va devor soatlari kolleksiyalari joy olgan.

Tadbir mehmonlariga zamonaviy asbob-uskunalar, vositalar, furnitura hamda ishlab chiqarishda qoʻllaniladigan yangi texnologiyalar ham taqdim etilmoqda.

Mazkur koʻrgazmaning oʻziga xos jihati shundaki, tashrif buyuruvchilar nafaqat mahsulotlar bilan tanishishlari, balki ularni jozibador narxlarda xarid qilishlari ham mumkin.

Mahalliy va xorijiy kompaniyalar oʻrtasida yaqin hamkorlikni yoʻlga qoʻyish, zargarlik sanoatini yangi bosqichga olib chiqish imkonini beruvchi “Uzbek Jewellery Fair – 2023» biznes dasturi doirasida B2B uchrashuvlari tashkil etildi.

Natijalarga koʻra, zargarlik buyumlari ishlab chiqaruvchilar oʻrtasida “Maftunkor Sharq” tanlovi gʻolib va ​​sovrindorlari aniqlanadi, ularga “Uzbek Jewellery Awards” mukofoti topshiriladi.

Koʻrgazma joriy yilning 28-mayigacha davom etadi.