2022-yil 22-noyabrda Fransiya Respublikasi Milliy taʼlim va yoshlar vazirligi bilan imzolangan “Maktabgacha taʼlim sohasida hamkorlik qilish toʻgʻrisida”gi deklaratsiyaga koʻra, joriy yilning 6-oktyabrda Oʻzbekiston Respublikasi Maktabgacha taʼlim va maktab taʼlimi vazirining birinchi oʻrinbosari – Maktabgacha taʼlim agentligi direktori A.Shin Fransiya Respublikasining Oʻzbekiston Respublikasidagi Favqulodda va muxtor elchisi Oreliya Bushes xonim taklifiga binoan Toshkent shahrining Mirzo-Ulugʻbek tumanidagi Fransiya Toshkent litseyiga (Lycee Français de Tachkent) tashrif buyurdi. Oʻzbekiston tomoni 3 yoshdan 18 yoshgacha boʻlgan bolalar va oʻsmirlarni oʻqitishga qaratilgan litsey faoliyati bilan tanishdi.

Maʼlumot uchun: Bugungi kunda Markaziy Osiyodagi yagona fransuz litseyi boʻlmish Toshkent fransuz litseyi 1997-yilda Fransiyalik muhojir ota-onalarning tashabbusi bilan tashkil etilgan boʻlib, ular bir tomondan farzandlarining taʼlim-tarbiyasida hech qanday uzilish boʻlmasligini orzu qilgan. ikkinchi tomondan, fransuz tilini sevuvchilar va biluvchilar uchun Oʻzbekistonda yuqori sifatli taʼlim imkoniyati paydo boʻldi. Fransiyaning Oʻzbekistondagi elchisi homiyligida litsey Fransiyaning xorijdagi xalq taʼlimi negizida faoliyat yuritadi.

Mazkur taʼlim dargohida 100 dan ortiq oʻquvchi tahsil olmoqda, ularning 70 foizi Oʻzbekiston fuqarolari va oʻnga yaqin turli millat vakillaridir. 20 dan ortiq oʻqituvchilar bolalar bogʻchasidan yuqori sinfgacha yuqori darajadagi fransuz taʼlimini hamda maktab boshlanganidan beri BAC va Brevet diplomlari uchun 99% muvaffaqiyat darajasini taʼminlaydilar.

Boshlangʻich maktabdan boshlab ingliz va rus tillari oʻrganiladi; butun oʻqish davrida fransuz tilidan tashqari 4 ta chet tili ham taklif etiladi. 2001-yildan buyon Toshkent fransuz litseyi AEFEning rasman tan olingan hamkori hisoblanadi.

Tashrif davomida Oʻzbekiston delegatsiyasi oʻquv jarayonini tashkil etish, ovqatlanish, sport mashgʻulotlari bilan tanishdi, shuningdek, maktabgacha yoshdagi bolalar uchun moʻljallangan dasturni atroflicha oʻrgandi. Shuni taʼkidlash kerakki, Fransiya maktabgacha taʼlim dasturining asosiy maqsadi bolalarning maktab dasturlariga muammosiz oʻtishini taʼminlashdir.

A.Shin ushbu litsey bilan maktabgacha yoshdagi bolalar uchun fransuz tili oʻquv dasturlarini ishlab chiqish kabi dolzarb yoʻnalishlarda fransuz oʻqituvchilari tajribasini almashish borasida hamkorlikni yoʻlga qoʻyish zarurligini taʼkidladi.