2022 йил 22 ноябрда Франция Республикаси Миллий таълим ва ёшлар вазирлиги билан имзоланган “Мактабгача таълим соҳасида ҳамкорлик қилиш тўғрисида”ги декларацияга кўра, жорий йилнинг 6 октябрда Ўзбекистон Республикаси Мактабгача таълим ва мактаб таълими вазирининг биринчи ўринбосари – Мактабгача таълим агентлиги директори А.Шин Франция Республикасининг Ўзбекистон Республикасидаги Фавқулодда ва мухтор элчиси Орелия Бушес хоним таклифига биноан Тошкент шаҳрининг Мирзо-Улуғбек туманидаги Франция Тошкент лицейига (Lycee Français de Tachkent) ташриф буюрди. Ўзбекистон томони 3 ёшдан 18 ёшгача бўлган болалар ва ўсмирларни ўқитишга қаратилган лицей фаолияти билан танишди.

Маълумот учун: Бугунги кунда Марказий Осиёдаги ягона француз лицейи бўлмиш Тошкент француз лицейи 1997 йилда Франциялик муҳожир ота-оналарнинг ташаббуси билан ташкил этилган бўлиб, улар бир томондан фарзандларининг таълим-тарбиясида ҳеч қандай узилиш бўлмаслигини орзу қилган. иккинчи томондан, француз тилини севувчилар ва билувчилар учун Ўзбекистонда юқори сифатли таълим имконияти пайдо бўлди. Франциянинг Ўзбекистондаги элчиси ҳомийлигида лицей Франциянинг хориждаги халқ таълими негизида фаолият юритади.

Мазкур таълим даргоҳида 100 дан ортиқ ўқувчи таҳсил олмоқда, уларнинг 70 фоизи Ўзбекистон фуқаролари ва ўнга яқин турли миллат вакилларидир. 20 дан ортиқ ўқитувчилар болалар боғчасидан юқори синфгача юқори даражадаги француз таълимини ҳамда мактаб бошланганидан бери BAC ва Brevet дипломлари учун 99% муваффақият даражасини таъминлайдилар.

Бошланғич мактабдан бошлаб инглиз ва рус тиллари ўрганилади; бутун ўқиш даврида француз тилидан ташқари 4 та чет тили ҳам таклиф этилади. 2001 йилдан буён Тошкент француз лицейи AEFEнинг расман тан олинган ҳамкори ҳисобланади.

Ташриф давомида Ўзбекистон делегацияси ўқув жараёнини ташкил этиш, овқатланиш, спорт машғулотлари билан танишди, шунингдек, мактабгача ёшдаги болалар учун мўлжалланган дастурни атрофлича ўрганди. Шуни таъкидлаш керакки, Франция мактабгача таълим дастурининг асосий мақсади болаларнинг мактаб дастурларига муаммосиз ўтишини таъминлашдир.

А.Шин ушбу лицей билан мактабгача ёшдаги болалар учун француз тили ўқув дастурларини ишлаб чиқиш каби долзарб йўналишларда француз ўқитувчилари тажрибасини алмашиш борасида ҳамкорликни йўлга қўйиш зарурлигини таъкидлади.