Foto: Akmal Muhammadov / “Xalq soʻzi”

Senatning yalpi majlisida “Oʻzbekiston Respublikasining ayrim qonun hujjatlariga toʻlov tizimi operatorlari va toʻlov tashkilotlari faoliyatini takomillashtirishga qaratilgan oʻzgartirish va qoʻshimchalar kiritish toʻgʻrisida”gi Qonun muhokama qilindi.

Keyingi yillarda mamlakatimizda raqamli toʻlov xizmatlari bozorini rivojlantirishga, moliyaviy xavf-xatarlarni kamaytirishga hamda toʻlov xizmatlari isteʼmolchilarining huquqlarini taʼminlashga qaratilgan izchil islohotlar amalga oshirilmoqda.

Yalpi majlisda tijorat banklari, toʻlov tizimlari operatorlari va toʻlov tashkilotlarida bank kartalaridan foydalangan holda oʻgʻirlik hamda firibgarlik hollari sodir etilishining oldini olishga qaratilgan zamonaviy tizimlar va boshqa himoya mexanizmlarini tashkil etish zarurati yuzaga kelayotgani taʼkidlab oʻtildi.

Qonun bilan Oʻzbekiston Respublikasining “Toʻlovlar va toʻlov tizimlari toʻgʻrisida”gi, “Oʻzbekiston Respublikasining Markaziy banki toʻgʻrisida”gi, “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi hamda “Litsenziyalash, ruxsat berish va xabardor qilish tartib-taomillari toʻgʻrisida”gi qonunlariga operatorlar hamda toʻlov tashkilotlari faoliyatini tartibga solishga, antifrod tizimini va biometrik identifikatsiya tizimlarini joriy etishga, shuningdek litsenziyalash jarayonlarini soddalashtirishga qaratilgan oʻzgartirish va qoʻshimchalar kiritish nazarda tutilmoqda.

Mazkur Qonun toʻlov xizmatlari bozorida xavfsizlikni taʼminlashga, moliyaviy firibgarliklarning oldini olishga, toʻlov tizimi operatorlari va toʻlov tashkilotlari faoliyatini yanada takomillashtirishga, shuningdek isteʼmolchilar huquqlarini samarali himoyalashga xizmat qiladi.

Senatorlarning fikricha, Qonun raqobat muhitini taʼminlash, litsenziyalash jarayonlarini kamaytirish va banklarning toʻlov xizmatlari bozoridagi faoliyatini ragʻbatlantirishga keng imkoniyatlar yaratadi.

Muhokama yakunida Qonun senatorlar tomonidan maʼqullandi.