Yaqinda “Mening fikrim” veb-portalida “Avtotransport vositasining sugʻurtasi yoʻqligi yoki texnik koʻrikdan oʻtmaganligi tufayli jarima maydoniga qoʻyish amaliyotini bekor qilish haqida”gi taklif 10 000dan ortiq ovoz olgan edi.

Ushbu taklif Nizomga muvofiq Oliy Majlisi Qonunchilik palatasida koʻrib chiqilib, deputatlar tomonidan uni amalga oshirish maqsadida Maʼmuriy javobgarlik toʻgʻrisidagi kodeksga tegishli oʻzgartirish va qoʻshimchalar kiritish boʻyicha qonun loyihasi ishlab chiqildi.

Qonun loyihasida transport vositalari egalarining oʻz fuqarolik javobgarligini majburiy sugʻurta qilmaganligi (yoki DYHXX xodimi soʻragan vaqtida yonida boʻlmaganligi) uchun transport vositasini jarima maydonida majburiy ushlab turish amaliyotini bekor qilish nazarda tutilmoqda.

Oʻrganishlar xorijiy davlatlarda xususan Germaniya, Angliya, Rossiya Federatsiyasi, Belarus Respublikasi, AQSHning bir qator shtatlarida fuqarolik javobgarligini majburiy sugʻurta qilish boʻyicha sugʻurta polislari boʻlmasa, maʼmuriy jarimalar belgilangan boʻlib, biroq transport vositasini ushlab turish koʻrsatilmaganligini koʻrsatmoqda.

Qonun loyihasi tez orada Qonunchilik palatasining yalpi majlisida koʻrib chiqiladi.

Rasul Kusherbayev,
Oliy Majlis Qonunchilik palatasi deputati