1-fevral kuni Sirdaryoda sodir boʻlgan yoʻl-transport hodisasi natijasida besh kishi hayotdan koʻz yumdi. Bu haqda IIV huzuridagi Tergov departamenti xabar berdi.

Qayd qilinishicha, 1-fevral kuni taxminan soat 08:30 larda 19 yoshli Sh.B., oʻzining boshqaruvidagi “Cobalt” rusumli avtomashinasida, Guliston shahar 4-mavze Guliston koʻchasi boʻylab oʻtgan avtomobil yoʻlida “Guliston-Zarbdor” yoʻnalishi boʻyicha harakatlanib ketayotganida, boshqaruvni yoʻqotishi oqibatida yoʻlning qarama-qarshi yoʻnalishiga oʻtib ketib, fuqaro 21 yoshli S.M.,ning boshqaruvida boʻlgan “Damas” rusumli avtomashina bilan toʻqnashib, yoʻl-transport hodisasini sodir etgan.

Natijada “Damas” rusumli avtomashina haydovchisi S.M., yoʻlovchilari 55 yoshli Sh.A., 27 yoshli D.E., 28 yoshli M.S.lar hodisa sodir boʻlgan joyda vafot etganlar. Yana 3 nafar shaxs shifoxonaga yotqizilgan. Shuningdek 24 yoshli S.A.,ga koʻrsatilgan tibbiy yordamiga qaramay, shifoxonada vafot etgan.

Mazkur holat yuzasidan Sirdaryo viloyati IIB huzuridagi Tergov boshqarmasi tomonidan Oʻzbekiston Respublikasi Jinoyat kodeksining 266-moddasi 3-qismi “a” bandi (Odamlar oʻlimiga sabab boʻlgan transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qoʻzgʻatilgan. Dastlabki tergov harakatlari davom ettirilmoqda.