Foto: “Xalq soʻzi”

Jahongir BOYMURODOV, /“Xalq soʻzi”. Shahrisabz tumanining eng chekka va togʻli hududlaridan biri — Abziyat mahallasida yangi maktabgacha taʼlim tashkiloti foydalanishga topshirildi.

Shu munosabat bilan tashkil etilgan tadbirda soʻzga chiqqanlar tomonidan taʼkidlanganidek, bugun mamlakatimizda maktabgacha yoshdagi bolalarning sifatli taʼlim va tarbiya olishlari uchun barcha shart-sharoitlar yaratilmoqda. Eng chekka hududlarda ham zamonaviy maktabgacha taʼlim tashkilotlari barpo etilib, foydalanishga topshirilyapti. Abziyat mahallasida 120 oʻringa moʻljallangan zamonaviy maktabgacha taʼlim tashkilotining ish boshlashi bu boradagi ishlarning yana bir namunasi boʻldi.

— Mahallamizdagi eski bogʻcha moslashtirilgan binoda joylashgan boʻlib, soʻnggi yillarda oʻta taʼmirtalab ahvolga kelib qolgandi, — deydi Shahrisabz tumanidagi 25-DMTT mudirasi Hulkar Qodirova. — Oʻtgan yili eski bino buzib tashlanib, oʻrnida zamonaviy inshoot qurish ishlari boshlangandi. Bugun mana shunday koʻrkam va barcha shart-sharoitlarga ega maktabgacha taʼlim tashkiloti foydalanishga topshirildi. Bu yerda bolajonlarga sifatli taʼlim va tarbiya berish uchun barcha imkoniyatlar muhayyo etilgan.

Maʼlumot oʻrnida aytib oʻtish joiz, 2016-yilda Qashqadaryoda mavjud bogʻchalar soni 326 tani, qamrov darajasi esa 13 foizni tashkil etardi. Hozir viloyatda 3500 dan ortiq maktabgacha taʼlim tashkilotlari faoliyati yoʻlga qoʻyilgan boʻlib, qamrov darajasi 60 foizdan ortdi.