Foto: president.uz

Hokimning hisobotini tinglab, Prezidentimiz mutasaddilarga tegishli topshiriqlarni berdi. Jumladan:

— Shahrisabzning Miraki, Suvtushar va Sarchashma, Kitobning Qaynar va Bashir, Qamashidagi Beshterak va Mirishkordagi Jeynov qishloqlarida turizmni rivojlantirish;

— yil yakuniga qadar Qashqadaryo viloyatida mavjud 46 ta kon zaxiralarini xatlovdan oʻtkazib, auksionga chiqarish;

— Muborak, Nishon, Gʻuzor va Mirishkor tumanlarida sotilmasdan turgan 82 ta davlat mulki narxini 50 foizga kamaytirib, savdoga chiqarish;

— Shahrisabz shahridagi boʻsh turgan mulklar negizida kichik sanoat zonalari tashkil etish;

— «Rubikon Voter» texnologiyasi asosida Qashqadaryoda sugʻorish tizimini yaxshilash loyihasini kengaytirish masalasini ishlab chiqish;

— 2023-yil 1-iyulga qadar Gʻuzor-Buxoro-Nukus-Beyneu yoʻlining 100 kilometr qismini taʼmirlash loyihasini ishlab chiqib, ishlarni boshlash;

— yil yakuniga qadar Samarqanddan Shahrisabzga oʻtuvchi 30 kilometr yoʻlni taʼmirlash loyihasini ishlab chiqish;

— Koson tumanidagi industrial zona infratuzilmasi uchun 40 milliard soʻm ajratish vazifasi qoʻyildi.

Shuningdek, mutasaddilarga Qashqadaryoda ijtimoiy sohani yaxshilash maqsadida:

— 13 ta bogʻchani qayta qurish hamda 14 ta mahallada yangi bogʻcha qurish loyihasini 2023-yil investitsiya dasturiga kiritish;

— yil yakuniga qadar 189 ta oilaviy bogʻcha tashkil etishga 4,5 milliard soʻm, 2023-yilda 380 ta bogʻcha tashkil etishga 52 milliard soʻm subsidiya ajratish;

— bir oy muddatda “Ona va bola tibbiyot markazi”ni jihozlash boʻyicha loyihani tayyorlash;

— kelgusi ikki yilda Qarshi va Shahrisabz shaharlari, Koson, Nishon va Chiroqchida qoʻshimcha 550 oʻrinli tugʻruq komplekslarini tashkil etish;

— yil yakuniga qadar zamonaviy tibbiy uskunalar xaridi uchun 2 milliard soʻm ajratib, 21 turdagi yuqori texnologik amaliyotlarni yoʻlga qoʻyish;

— yil yakuniga qadar Kitob va Qarshi tumanlarida “Yangi Oʻzbekiston” massivlarini tashkil etish boʻyicha taklif kiritish;

— bir oy muddatda 48 ta maktabni tanlab olib, kelgusi oʻquv yilidan Finlyandiya taʼlim tizimini joriy etish topshirildi.