Joriy yilning 31-mart kuni Oliy Majlis Senatining Yoshlar, xotin-qizlar, madaniyat va sport masalalari qoʻmitasi hamda Oila va xotin-qizlar qoʻmitasi huzuridagi “Oila va gender” ilmiy-tadqiqot instituti oʻrtasida hamkorlik memorandumi imzolandi.

Mazkur memorandum mamlakatimizda oila institutini mustahkamlash, xotin-qizlarni har tomonlama qoʻllab-quvvatlash va gender tenglikni taʼminlashga qaratilgan islohotlarni ilmiy jihatdan qoʻllab-quvvatlashda muhim ahamiyat kasb etadi.

Hujjat doirasida oila va gender siyosati sohasida qonunchilikni takomillashtirish, xotin-qizlarning huquq va manfaatlarini himoya qilish, ularning ijtimoiy-iqtisodiy faolligini oshirishga qaratilgan takliflar ishlab chiqish boʻyicha hamkorlik qilinadi.

Shuningdek, oilalar barqarorligini taʼminlash, xotin-qizlar bandligini oshirish, gender tenglikni taʼminlashga oid masalalar yuzasidan sotsiologik tadqiqotlar oʻtkazish, ilmiy-tahliliy materiallar tayyorlash va ekspertlik xulosalarini ishlab chiqish nazarda tutilgan.

Xotin-qizlar va oilalar muammolarini chuqur oʻrganish, ularni hal etishga qaratilgan amaliy mexanizmlarni joriy etish, shuningdek, ilgʻor xalqaro tajribani oʻrganish va amaliyotga tatbiq etishga alohida eʼtibor qaratiladi.