Жорий йилнинг 31 март куни Олий Мажлис Сенатининг Ёшлар, хотин-қизлар, маданият ва спорт масалалари қўмитаси ҳамда Оила ва хотин-қизлар қўмитаси ҳузуридаги «Оила ва гендер» илмий-тадқиқот институти ўртасида ҳамкорлик меморандуми имзоланди.

Мазкур меморандум мамлакатимизда оила институтини мустаҳкамлаш, хотин-қизларни ҳар томонлама қўллаб-қувватлаш ва гендер тенгликни таъминлашга қаратилган ислоҳотларни илмий жиҳатдан қўллаб-қувватлашда муҳим аҳамият касб этади.

Ҳужжат доирасида оила ва гендер сиёсати соҳасида қонунчиликни такомиллаштириш, хотин-қизларнинг ҳуқуқ ва манфаатларини ҳимоя қилиш, уларнинг ижтимоий-иқтисодий фаоллигини оширишга қаратилган таклифлар ишлаб чиқиш бўйича ҳамкорлик қилинади.

Шунингдек, оилалар барқарорлигини таъминлаш, хотин-қизлар бандлигини ошириш, гендер тенгликни таъминлашга оид масалалар юзасидан социологик тадқиқотлар ўтказиш, илмий-таҳлилий материаллар тайёрлаш ва экспертлик хулосаларини ишлаб чиқиш назарда тутилган.

Хотин-қизлар ва оилалар муаммоларини чуқур ўрганиш, уларни ҳал этишга қаратилган амалий механизмларни жорий этиш, шунингдек, илғор халқаро тажрибани ўрганиш ва амалиётга татбиқ этишга алоҳида эътибор қаратилади.