Saudiya Arabistonining “Swift News” elektron nashri sahifasida “YUNESKO Oʻzbekistonning Xiva shahrini jahon merosi sifatida qabul qilgan” sarlavhali maqola eʼlon qilindi, deb xabar bermoqda “Dunyo” AA muxbiri.

Unda Xiva osoyishta va sayyohlik shahar boʻlib, u Osiyodan Yevropagacha choʻzilgan qadimgi Buyuk Ipak yoʻli boʻyida joylashgani, 2500-yillik tarixga ega ushbu koʻhna kent Oʻzbekistonning eng goʻzal sayyohlik markazlaridan biri ekanligi oʻquvchilarning eʼtiboriga havola qilingan. “Koʻhna tarix va noyob meʼmorchilik namunalariga ega Xiva shahri YUNESKO tomonidan Jahon merosi roʻyxatiga kiritilgan”, deb yozadi elektron nashr.

Shuningdek, maqolada Xivadagi madrasa, masjid, minora va saroylar XVII-XX asrlarda mavjud boʻlgan Xiva xonligi davriga xosligi, ularda ushbu betakror inshootlarni barpo etgan meʼmorlarning isteʼdodi namoyon ekanligi qayd etilgan.

“Xiva shahrining tor koʻchalari boʻylab yurar ekansiz, paxsa uylar orasida adashib ketishingiz mumkin. Hunarmandlar ota-bobolari singari metall va yogʻochdan turli oʻymakorlik mahsulotlarini hali ham  yasashadi”.

Yuqoridagilar bilan birga, maqolada Kalta Minor, Tosh saroy, eski shahar devorlariga doir maʼlumotlar ham qalamga olingan.

Maʼlumot tariqasida qayd etish joizki, Saudiya Arabistonidagi mashhur elektron nashrlaridan biri hisoblanadigan “Swift News” elektron nashri siyosiy, iqtisodiy va madaniy sohalarga oid xabar va maqolalarni yoritishga ixtisoslashgan.