Samarqand viloyatida haydovchilik guvohnomasini olib berish bilan bogʻliq firibgarlik holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Toyloq tumani boʻlimi tomonidan oʻtkazilgan tergovga qadar tekshiruvda fuqaro D.B. fuqaro A.Q.ga goʻyoki yuqori lavozimlarda ishlovchi tanishlari orqali haydovchilik guvohnomasini bekor qildirmaslik evaziga 2,5 ming dollarni firibgarlik yoʻli bilan qoʻlga kiritgan. Tekshiruv davomida ushbu pullar hisobidan 1,2 mln soʻmning qaytarilishi protsessual tartibda rasmiylashtirilgan.

Departamentning Jomboy tumani boʻlimi xodimlari tomonidan oʻtkazilgan tergovga qadar tekshiruvda fuqaro F.E. fuqarolar M.M. va F.E.ga haydovchilik guvohnomalari olib berishini vaʼda qilib, 2,1 ming dollarni firibgarlik yoʻli bilan qoʻlga kiritib, oʻz ehtiyoji uchun ishlatib yuborganligi aniqlangan.

Bildirilishicha, hozirda mazkur holatlar yuzasidan Jinoyat kodeksining 168-moddasi (firibgarlik) va 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.