Samarqand viloyatida energiya resurslaridan noqonuniy foydalanish holatlari fosh etildi. Bu haqida Iqtisodiy jinoyatlarga qarshi kurashish departamenti xabar berdi.

Maʼlum qilinishicha, Bosh prokuratura huzuridagi Departamentning Jomboy tumani boʻlimi tomonidan tergovga qadar tekshiruv oʻtkazilgan.

Unda fuqaro F.K. “Dehqonobod” MFY hududidagi dala hovlisida umumiy foydalanishdagi elektr tarmogʻiga tijorat maqsadida toʻgʻridan-toʻgʻri ulanib, 324,4 mln soʻmlik elektr energiyasidan noqonuniy foydalanganligi aniqlangan.

Shu kabi yana bir holat, Departamentning Kattaqoʻrgʻon tumani boʻlimi tomonidan oʻtkazilgan tergovga qadar tekshiruvda ham oshkor boʻlgan.

Unga koʻra, “K.G.” MCHJ rahbari G.M. “Navbahor” MFY hududidagi ishlab chiqarish sexida umumiy foydalanishdagi elektr tarmogʻiga tijorat maqsadida toʻgʻridan-toʻgʻri ulanib, 112,2 mln soʻmlik elektr energiyasidan noqonuniy foydalangani maʼlum boʻlgan.

Shuningdek, Departamentning Samarqand shahar boʻlimi tomonidan oʻtkazilgan tergovga qadar tekshiruvda “Sh.S.” MCHJ rahbari D.Sh. Samarqand shahrida foydalanishga topshirilgan koʻp qavatli uyni umumiy foydalanishdagi tabiiy gaz tarmogʻiga oʻzboshimchalik bilan ulab, 241 mln soʻmlik tabiiy gazdan noqonuniy foydalangani fosh etilgan.

Hozirda mazkur holatlar yuzasidan Jinoyat kodeksining 169-moddasi (oʻgʻrilik) bilan jinoyat ishlari qoʻzgʻatilib, tergov harakatlari oʻtkazilmoqda.