Foto: “Xalq soʻzi”

Qoʻqon davlat pedagogika institutida foydalanishga topshirilgan yangi oʻquv binosining tantanali ochilish marosimi boʻlib oʻtdi.

Mazkur binoning ochilishiga bagʻishlangan tantanalarda ishtirok etgan institutning oʻquv ishlari boʻyicha prorektor Nargiza Babayeva, Ilmiy ishlar va innovatsiyalar boʻyicha prorektor Nurbek Joʻrayevlar bu kabi imkoniyatlar yaratilayotgani, shart-sharoitlarning yaxshilanishi talabalarga qulaylik yaratishini taʼkidladilar.

Vatanimiz mustaqilligining 31 yilligida mazkur binoning foydalanishga topshirilishi esa, bayramga munosib tuhfa boʻldi.

Maʼlumot oʻrnida aytish mumkinki, qayta taʼmirlangan va jihozlangan mazkur oʻquv binosi bir vaqtning oʻzida 2300 nafardan ortiq talabani oʻz bagʻriga oladi. Oʻquv auditoriyalari zamonaviy qattiq va yumshoq inventarlar, kompyuter, proyektor, televizor kabi texnologiyalar bilan taʼminlangan. Yangi binoda maʼruzalar zallari, maʼnaviy-maʼrifiy xonalar mavjud boʻlib, talaba va pedagoglarning dars jarayonlarini olib borishi uchun barcha shart-sharoitlar yaratilgan.

Endilikda talabalar yangi oʻquv binoda oʻz yoʻnalishlari boʻyicha puxta bilim va koʻnikmaga ega boʻlishadi.