Musulmonlar idorasi roʻza buzilishiga sabab boʻladigan amallar roʻyxatini eʼlon qildi.

Quyidagi amallar orqali roʻza buziladi va faqat qazo roʻza tutish vojib boʻladi:

1. Roʻzani safarga chiqish, kasallik, hayz-nifos va aqldan ozish kabi sabablar bilan buzilsa;

2. Odatda tanavvul qilinmaydigan narsalar, masalan, qogʻoz va loy kabilarni isteʼmol qilinsa;

3. Tosh, temir, oltin, kumush va boshqa qattiq jismlarni yutilsa;

4. Zoʻrlanganlik oqibatida yeb-ichilsa;

5. Hali tong otmadi deb oʻylab yeb-ichish yoki jinsiy aloqa qilib qoʻyilsa-yu, aslida tong otib boʻlgan boʻlsa yohud kun botdi degan gumon bilan ogʻizni ochib qoʻysa-yu, buning aksi boʻlib chiqsa;

6. Ogʻiz yoki burunni chayishda ehtiyotsizlik tufayli suvni ichkariga kiritib yuborsa;.

7. Qasddan koʻngilni aynitish tufayli ogʻizdan toʻlib qayd qilsa;

8. Qor yoki yomgʻir ogʻizga tushsa;.

9. Tutunni qasddan hidlasa;

Tishlar orasida qolgan noʻxot va undan katta hajmdagi ovqat qoldigʻini yutsa;

10. Roʻzani unutib yeb yoki ichib qoʻygach, endi roʻzam ochilib ketdi degan gumon bilan tanavvulni davom ettirsa;

11. Tundan niyat qilmagani uchun roʻzani buzsa;

12. Kun yarmidan keyin safarga chiqib, roʻzani ochib yuborsa;

13. Niyat qilmay kun boʻyi yemoq va ichmoqlardan tiyilib yursa;

14. Quloqqa tomizilgan yogʻ yoki suvning mazasini halqumida sezsa;

15. Burunga dori tomizsa;

16. Klizma qilsa;

17. Ayolini quchish yoki oʻpish tufayli maniy chiqsa;.

18. Qorindagi yaraga qoʻyilgan dorini oshqozonga va boshdagi yaraga qoʻyilgan dorini dimogʻga yetsa;

Ushbu yuqorida sanab oʻtilgan amallardan birini qilgan kishi Ramazonning hurmati uchun kunning qolganini oʻzini tiyish bilan oʻtkazishi zarur boʻladi hamda bir kuniga bir kun roʻza tutib beradi...