Poytaxt hokimligi shahar aholisini ogohlantirdi

Foto: Muhsin Umurzoqov / “Xalq soʻzi”

Bugun, 31-oktyabr kuni Toshkentda kuchli shamol kuzatilayotgani munosabati bilan poytaxt hokimligi shahar aholisi va mehmonlarini ogohlantirdi.

Bildirilishicha, ob-havo sharoitining yomonlashuvi sababli simlarning uzilishi, daraxtlarning qulashi va havoda chang miqdorining koʻpayishi mumkin.

Hokimlik ushbu sharoitda aholidan quyidagi tavsiyalarga alohida eʼtibor berishi soʻragan:

• avtomobillaringizni daraxtlar va elektr uzatish liniyalari ostida qoldirmang;

• koʻchada yurishni cheklang, ayniqsa allergiya yoki changga yuqori sezuvchanligingiz boʻlsa;

• shahar boʻylab harakatlanishda ehtiyotkor boʻling.

“Oʻzingizni, yaqinlaringizni va shaxsiy mulkingizni asrang”, deyiladi xabarda.

Shuningdek, favqulodda vaziyatlar yuz berganda ushbu telefon raqamlariga murojaat qilish aytilgan: 112, 1055, (71) 212-69-80, (71) 212-69-82.