Bugun, 8-dekabr kuni Oʻzbekiston isteʼmolchilar huquqlarini himoya qilish jamiyatlari federatsiyasi raisi Jahongir Sarimsoqov Xalqaro isteʼmolchilar jamiyatlar konfederatsiyasiga (KonfOP) aʼzo tashkilotlarning onlayn-videokonferensiya formatidagi amaliy uchrashuvida ishtirok etdi.

Yigʻilish ishtirokchilari oʻzbek xalqini va Oʻzbekiston isteʼmolchilar huquqlarini himoya qilish jamiyatlari federatsiyasi xodimlarini mamlakat Konstitutsiyasining 28 yillik bayrami bilan chin qalbdan tabrikladi va Konstitutsiyaning 53-moddasida isteʼmolchilar huquqi ustuvor ekani eʼtirof etilganini alohida taʼkidlab oʻtdi.

Uchrashuv davomida pandemiya sharoitida isteʼmolchilar huquqini himoya qilish borasida KonfOPga aʼzo tashkilotlar vakillari amalga oshirilayotgan ishlar hamda post-pandemiya davrida bu borada qilinishi kerak boʻlgan ish rejasi yuzasidan fikr almashdi.

J. Sarimsoqov federatsiya koronavirus pandemiyasi davrida isteʼmolchilar huquqini himoya qilish boʻyicha amalga oshirayotgan ishlar barobarida 2021-yil 4-6-may kunlari Xorazm viloyatining Urganch va Xiva shaharlarida turizm sohasida isteʼmolchilar huquqini himoya boʻyicha “Sayyoh-2021” xalqaro forumini oʻtkazishga tayyorgarlik koʻrayotgani haqida soʻzlab berdi.

Uning fikricha, turizm sohasini rivojlantirish nafaqat Oʻzbekiston, yoki Markaziy Osiyo, qolaversa, butun postsovet makoni uchun muhim ahamiyatga ega, chunki ushbu mamlakatlarning bu boradagi potensiali juda katta. Shu sababli turizm sohasini rivojlantirishda eng yuksak talablarga javob beradigan infratuzilma yaratish barobarida sayyohlarning isteʼmolchi sifatidagi huquq va manfaatlarini himoya qilish ham shu kunning eng dolzarb vazifalaridan biridir.

Isteʼmolchilar tashkilotlarining bu borada hamkorlik, xususan, bir-birining isteʼmolchi sayyohlarini himoya qilishi pandemiya davrida toʻxtab qolgan turizm sohasini tezda tiklash uchun qoʻshimcha omil boʻlib xizmat qilishi shubhasiz.

Onlayn uchrashuvda isteʼmolchilar huquq va manfaatlarini himoya qilishga oid boshqa masalalar ham muhokama qilindi.