Oʻzbekiston Respublikasi Statistika agentligi maʼlumotlariga koʻra, 2024-yilda jami 35,9 ming nafar Oʻzbekiston fuqarosi oʻqish maqsadida chet elga yoʻl olgan. Bu koʻrsatkich xalqaro taʼlimga boʻlgan qiziqishning yildan-yilga oshib borayotganini koʻrsatadi. Talabalar asosan bakalavriat, magistratura va boshqa akademik dasturlarda oʻqish uchun boshqa mamlakatlarga ketishyapti.

Chet elga oʻqishga ketganlarning asosiy qismi qoʻshni davlatlarga yoʻnaltirilgan. Tojikiston eng koʻp talabalarni qabul qilgan mamlakat boʻlib, bu yerga 12 ming 809 nafar oʻzbekistonlik talabalar borgan. Rossiya esa 8 ming 629 nafar talabani oʻqishga qabul qilib, ikkinchi oʻrinda turibdi. Qirgʻiz Respublikasiga 3 ming 953 nafar, Turkiyaga 2 ming 711 nafar, Koreya Respublikasiga esa 2 ming 77 nafar oʻzbekistonlik talabalar yoʻl olgan.

Qoʻshni davlatlardan tashqari, boshqa yirik taʼlim markazlari ham oʻzbekistonlik talabalarning eʼtiborini tortgan. Buyuk Britaniyaga 792 nafar, Xitoyga 767 nafar, AQSHga 576 nafar va BAAga 390 nafar talaba oʻqishga ketgan. Shuningdek, boshqa davlatlarda oʻqishni tanlaganlar soni 1602 nafarni tashkil qilmoqda.

Chet elda oʻqishni istagan oʻzbekistonlik talabalar orasida qoʻshni davlatlar til yaqinligi va taʼlimning maqbulligi sababli yetakchilik qilyapti. Shuningdek, boshqa davlatlardagi nufuzli universitetlar va oʻqish sharoiti ham talabalar uchun jozibador boʻlib qolmoqda. Ayniqsa, Turkiya va Koreya Respublikasidagi stipendiya dasturlari talabalarga qoʻshimcha imkoniyatlar yaratgan.

Chet elda taʼlim olayotgan oʻzbekistonlik talabalarning soni ortishi mamlakatning xalqaro bilim va koʻnikmalarga boʻlgan talabini qondirishga xizmat qiladi. Bu jarayon natijasida Oʻzbekiston kelajakda yuqori malakali mutaxassislar va xalqaro darajadagi kadrlarga ega boʻlishi mumkin.