Joriy yilning 14-15-dekabr kunlari Niderlandiyaning Elseiver kompaniyasi tomonidan “Oʻzbekistondagi Elseiver ilmiy kunlari” xalqaro konferensiyasi tashkil etildi. Unda Taʼlim sifatini nazorat qilish davlat inspeksiyasi boshligʻi Ulugʻbek Toshkenbayev, Oliy va oʻrta maxsus taʼlim vaziri oʻrinbosari Uzoqboy Begimqulov, Elseiver kompaniyasining Turkiya, Eron, Yaqin Sharq va Markaziy Osiyodagi mintaqaviy direktori janob Tayfun Bashal va boshqalar ishtirok etdi.

Konferensiyaning dastlabki kunida “Tadqiqotlar kelajagi” va “COVID-19 dan keyingi kelajak” mavzularida muhokamalar boʻlib oʻtdi.

Tadbirni kirish soʻzi bilan ochib bergan Taʼlim inspeksiyasi boshligʻi Ulugʻbek Toshkenbayev, konferensiya uchun tashkilotchilarga minnatdorchilik bildirar ekan, Oʻzbekistonda ilm-fan sohasidagi islohotlar va bu borada Taʼlim inspeksiyasi tomonidan amalga oshirilayotgan chora-tadbirlarga alohida toʻxtalib oʻtdi.

Taʼkidlanishicha, oliy taʼlim muassasalarida olib borilayotgan ilmiy-tadqiqot ishlari natijadorligini oshirish, shuningdek, yoshlarni ilmiy faoliyatga kengroq jalb qilish, fanlarning innovatsion infratuzilmasini shakllantirish, ilmiy-tadqiqot faoliyatini qoʻllab-quvvatlash maqsadida Oʻzbekiston Respublikasi Prezidenti tomonidan tasdiqlangan Oʻzbekiston Respublikasi oliy taʼlim tizimini 2030-yilgacha rivojlantirish konsepsiyasi asosida bir qator ishlar olib borilmoqda.

Xususan, dunyoning yetakchi mamlakatlari hamda THE, QS, ARWU, MULTI-ranking kabi nufuzli reyting agentliklari tajribasi asosida oliy taʼlim muassasalarining milliy reytingini aniqlash tizimi yoʻlga qoʻyildi.

Bundan tashqari, Ulugʻbek Toshkenbayev Elseiver kompaniyasi bilan tadqiqotlar imkoniyatlarini kengaytirish, ilmiy sohalarda xalqaro hamkorlikni yoʻlga qoʻyish va uning xalqaro hamjamiyat bilan integratsiyasini rivojlantirish boʻyicha amalga oshirilayotgan ishlarga toʻxtalib oʻtar ekan, bu orada barcha mahalliy universitetlarda SciVal platformasini joriy etish boʻyicha muzokaralar olib borilayotganini taʼkidladi.

— Dastlabki kelishuvlarga koʻra, ushbu platformaga Oʻzbekistonning 13 ta taʼlim muassasalari va ilmiy-tadqiqot institutlari kiritilgan boʻlib, bugungi kunda ularning ilmiy yoʻnalishdagi faolligi maʼlum darajada oshgan, — dedi Taʼlim inspeksiyasi boshligʻi oʻz nutqida. — Shuni ham aytish joizki, biz Elseiverning taʼlim sohasidagi islohotlarini samarali amalga oshirishda bizni muntazam qoʻllab-quvvatlashini juda qadrlaymiz.  Shuningdek, kelgusida mahalliy ilmiy nashrlarning Scopus xalqaro maʼlumotlar bazasidan joy olishi borasida amalga oshirilayotgan ishlarni yana-da jadallashtirish, bu borada hamkorlik yoʻnalishlarini kengaytirishga alohida eʼtibor qaratilayotganligi eʼtirof etildi.

Konferensiya davomida xalqaro ekspertlar tomonidan COVID-19 davrida sogʻliqni saqlash sohasidagi tadqiqotlar, Barqaror Rivojlanish Dasturini amalga oshirishda yuzaga kelayotgan muammolar va ularning yechimlari kabi qator mavzularda maʼruzalar qilindi.

Bugun, xalqaro konferensiyaning ikkinchi kuni nashrlarning Scopusʻda qayd etilishi, Elsevier tomonidan tavsiya qilinayotgan platformalar Scival hamda Pure dasturlarining ilmiy sohadagi imkoniyatlari bilan tanishtirish kabi mavzularda davom etyapti.