Moliya vazirligi Inqirozga qarshi kurashish jamgʻarmasining mablagʻlari qayerga sarf qilinganligi toʻgʻrisida maʼlumotlarni eʼlon qildi.

Jamgʻarmaning jami daromadi 7,44 trln soʻm boʻlgan, shularning 7,32 trln soʻmi (98,3%) xalqaro moliya institutlarining imtiyozli kreditlari evaziga shakllantirilgan.

Bugungi kungacha jami 3,3 trln soʻm xarajat qilingan.

Eng koʻp mablagʻ Sanitariya-epidemiologik osoyishtalik agentiligiga ajratilgan - 573 mlrd soʻm.

Keyingi eng koʻp mablagʻ “Issiq elektr stansiyalar” AJga sarflangan va 500 mlrd soʻm subsidiya berilgan.

Boshqa yirik xarajatlar quyidagilar:

406 mlrd – “Uzbekistan Airways” AJga ssuda;

401 mlrd — «Oʻzbekneftgaz» AJga subsidiya;

101 mlrd - “Uzbekistan Airports” AJga ssuda;

100 mlrd – Jamoat ishlari jamgʻarmasiga (ishsiz fuqarolarni vaqtincha ishlarga jalb qilish uchun);

60 mlrd – Kasaba uyushmalari federatsiyasiga (kam taʼminlangan xotin-qizlarni qoʻllab-quvvatlash uchun);

50 mlrd – Bandlikka koʻmaklashish jamgʻarmasiga (shaxsiy tomorqalarni rivojlantirish uchun);

40 mlrd —«Birinchi rezinotexnika zavodi» MCHJga ssuda;

11 mlrd – “Toshkent metropoliteni” va «Toshshahartransxizmat» xodimlariga ish haqi uchun.

Shuningdek, quyidagi maqsadlar yoʻlida ham mablagʻlar sarflangan:

504 mlrd – suv taʼminoti va irrigatsiya tadbirlari bilan bogʻliq xarajatlar uchun;

487 mlrd – shifoxonalar va karantin majmualarini qurish va jihozlash uchun;

70 mlrd – ijtimoiy nafaqalar uchun.