“Oʻzbekiston temir yoʻllari” rasmiy Telegram-kanalida yomgʻir paytida Samarqanddagi tunnel suv bosganiga izoh berdi.

Samarqand shahrida 31-dekabr kuni tantanali ravishda ochilgan 143 milliard soʻmlik avtomobil va tramvay tunneli uch kundan keyin yomgʻir paytida suv ostida qoldi. Bunga quruvchilar axlatni ayblamoqda.

“Koʻprikqurilish” tresti tunnelni qurilishni tugatmay, “bayramga” topshirganini tan oldi. Xabarda aytilishicha, asosiy qurilish-montaj ishlari yakunlangan boʻlib, avtomobil yoʻllaridagi tirbandlikni kamaytirish maqsadida tunnelni Yangi yil arafasida ochishga qaror qilingan.

Obodonlashtirish va suvni boshqa tomonga yoʻnaltiruvchi sugʻorish tarmogʻini qurish ishlari hamon davom etmoqda, dedi trest.

Quruvchilarning taxminiga koʻra, tunnel drenaj va sugʻorish tizimi oluklari tiqilib qolgani uchun suv ostida qolgan. Shu bilan birga, xabarda taʼkidlanishicha, tunnel qoplamasi “quruq oʻrnatish” usulida mahkamlangan va suv konstruksiyaga zarar yetkazmaydi.

“Koʻprikqurilish” kompaniyasi yomgʻir suvini toʻkish uchun nasoslar oʻrnatish, boʻgʻinlardagi asfalt qoplamani kesish orqali koʻtargichlar muammosini hal etishni rejalashtirganini aytdi. Trest yaqin kunlarda bu ishlarni yakunlashga vaʼda berdi.