AQSH Prezidenti Donald Tramp Oq uy apparati rahbari Syuzan Uaylsda erta bosqichdagi koʻkrak bezi saratoni tashxisi qoʻyilganini maʼlum qildi.

“U davolanishni kechiktirmasdan, bu sinovga darhol qarshi chiqishga qaror qildi. Uning shifokorlar jamoasi ajoyib va ​​prognoz juda yaxshi! Davolanish vaqtida u deyarli doimiy ravishda Oq uyda boʻladi, bu esa meni prezident sifatida juda xursand qiladi!” — deb yozdi Tramp 16-mart kuni oʻzining Truth Social ijtimoiy tarmogʻida.

68 yoshli Uayls The New York Times nashriga bergan intervyusida ishini davom ettirishini va taʼtilga chiqmasligini aytdi. Uning soʻzlariga koʻra, u oʻtgan hafta tashxis haqida bilganidan soʻng buni prezidentga maʼlum qilgan.

“Qoʻshma Shtatlardagi deyarli har sakkizinchi ayol ushbu tashxisga duch keladi. Har kuni bu ayollar oilasini tarbiyalashda, ishga borishda va oʻz jamiyatlariga kuch va qatʼiyat bilan xizmat qilishda davom etmoqdalar. Endi men ham ularning safiga qoʻshildim”, — dedi Uayls.

Syuzan Uayls — AQSH tarixida Oq uy apparati rahbari (Chief of Staff) lavozimini egallagan ilk ayol kishidir. U Donald Trampning saylovoldi kampaniyasidagi eng muhim figuralardan biri va hozirda maʼmuriyatning eng nufuzli vakillaridan hisoblanadi.