АҚШ Президенти Дональд Трамп Оқ уй аппарати раҳбари Сьюзан Уайлсда эрта босқичдаги кўкрак бези саратони ташхиси қўйилганини маълум қилди.

«У даволанишни кечиктирмасдан, бу синовга дарҳол қарши чиқишга қарор қилди. Унинг шифокорлар жамоаси ажойиб ва ​​прогноз жуда яхши! Даволаниш вақтида у деярли доимий равишда Оқ уйда бўлади, бу эса мени президент сифатида жуда хурсанд қилади!» — деб ёзди Трамп 16 март куни ўзининг Truth Social ижтимоий тармоғида.

68 ёшли Уайлс The New York Times нашрига берган интервьюсида ишини давом эттиришини ва таътилга чиқмаслигини айтди. Унинг сўзларига кўра, у ўтган ҳафта ташхис ҳақида билганидан сўнг буни президентга маълум қилган.

«Қўшма Штатлардаги деярли ҳар саккизинчи аёл ушбу ташхисга дуч келади. Ҳар куни бу аёллар оиласини тарбиялашда, ишга боришда ва ўз жамиятларига куч ва қатъият билан хизмат қилишда давом этмоқдалар. Энди мен ҳам уларнинг сафига қўшилдим», — деди Уайлс.

Сьюзан Уайлс — АҚШ тарихида Оқ уй аппарати раҳбари (Chief of Staff) лавозимини эгаллаган илк аёл кишидир. У Дональд Трампнинг сайловолди кампаниясидаги энг муҳим фигуралардан бири ва ҳозирда маъмуриятнинг энг нуфузли вакилларидан ҳисобланади.