Navoiyda ikki avtomobil toʻqnashib ketishi oqibatida ikki kishi vafot etdi. Ularning biri endi bir yoshga toʻlgan chaqaloq edi. Bu haqda IIV huzuridagi Tergov departamenti xabar berdi.

2020-yilning 9-fevral kuni taxminan soat 01:50larda 24 yoshli R.N. “Lacetti” rusumli avtomashinasini Konimex tumani hududidan oʻtuvchi A-379 “Zarafshon-Navoiy” avtomobil yoʻli boʻylab boshqarib borib, mazkur yoʻlning 154 km.da belgilangan tezlikni oshirgan holda harakatlanib kelayotgan vaqtida, boshqaruvni yoʻqotib, qarama-qarshi harakat yoʻnalishiga chiqib ketgan va 23 yoshli N.J. ning boshqaruvida boʻlgan “Nexia” rusumli avtomashinasi bilan toʻqnashib, yoʻl-transport hodisasi sodir qilgan.

Natijada “Nexia” rusumli avtomashina haydovchisi N.J. voqea joyida va avtomashina yoʻlovchisi 1 yoshli chaqaloq A.Sh. Zarafshon shahar tibbiyot birlashmasida vafot etgan.

Mazkur holat yuzasidan Konimex tumani IIB huzuridagi Tergov boʻlimi tomonidan Oʻzbekiston Respublikasi Jinoyat kodeksining 266-moddasi 3-qismi “a” bandi (odamlar oʻlimiga sabab boʻlgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qoʻzgʻatilgan. Hozirda dastlabki tergov harakatlari olib borilmoqda.