Bugun yoz chillasining oʻrtasida  Namanganning shimolida joylashgan Kosonsoy shahrida   bir qator tabiat hodisalari kuzatildi. Bu yerda    qoq tushda avvaliga  doʻl   yogʻa boshladi. Yaqin oʻn daqiqa davom etgan yogʻingarchilik  faqatgina shaharning Obod, Jar va Olmazor mahallalaridagina yuz berib, osmondan tushgan   yongʻoqday doʻl donachalari   hovlilardagi tomorqa va tokzorlarga jiddiy zarar yetkazdi, uzum mevalari toʻkilib, daraxtlar bargi uzilib tushdi.

Xabarlarga qaraganda, tabiat injiqligi bu bilan toʻxtab qolmay doʻl orqasidan  Kosonsoy soyini toʻldirib kelgan  sel koʻpchilikni shoshirib qoʻydi. Baʼzi joylarda kuchli  oqim domiga tushib qolgan odamlar qutqarib qolinganligi aytilmoqda. Ayni paytda shahar mahallalari ichiga ham kirib borgan sel suvlarini bartaraf etish uchun Favqulodda vaziyatlar xizmati  kuchlari tezkorlik bilan yordam koʻrsatmoqda.

Kosonsoydagi singari yirik doʻl donalari qoʻshni Yangiqoʻrgʻon tumanining Iskovot qishlogʻida ham yogʻib oʻtganligi haqida maʼlumotlar tarqaldi.

Qudratilla NAJMIDDINOV,

“Xalq soʻzi”