Maktabgacha va maktab taʼlimi vaziri Hilola Umarova rahbarligida oʻtkazilgan navbatdagi kengaytirilgan Hayʼat majlisda oʻtgan oʻquv yilida amalga oshirilgan ishlar hamda 2023-2024 oʻquv yilida bajarilishi zarur boʻlgan ustuvor masalalarga atroflicha toʻxtalib oʻtildi.

Joriy yilda oliy taʼlim muassasalariga davlat granti asosida oʻqishga qabul qilingan abituriyentlarning 77 foizi (2022-yilda 74 foiz)ni mazkur oʻquv yilida maktabni bitirgan oʻquvchilar tashkil etmoqda.

Xalqaro fan olimpiadalarida yurtimiz maktab oʻquvchilari 69 ta, jumladan, 5 ta nufuzli olimpiadada 13 ta medalni qoʻlga kiritib, Oʻzbekiston tarixidagi eng yaxshi natijaga erishdi.

Joriy yilda maktabgacha taʼlim tashkilotlari soni 30 792 taga yetib, qamrov 72,0 foizga, tayyorlov guruhlarida 6 yoshli bolalarning qamrovi esa 90,0 foizga yetdi.

Yigʻilish davomida vazirlik tizimidagi taʼlim muassasalarni kuz-qish mavsumiga tayyorgarlik jarayonlariga ham toʻxtalib oʻtildi.

Tizimdagi fuqarolar murojaatlari bilan ishlash samaradorligini oshirish maqsadida joriy yil sentyabr oyining shu kunidan oktyabr oyi yakuniga qadar “Dolzarb oylik” etib belgilandi.