Xorazm, Navoiy, Jizzax va Andijon viloyatlarida noqonuniy valyuta ayirboshlash bilan shugʻullangan shaxslar qoʻlga olindi. Bosh prokuratura huzuridagi Departament va ichki ishlar xodimlari tomonidan oʻtkazilgan tezkor tadbirlar davomida qator shaxslar noqonuniy valyuta ayirboshlash bilan shugʻullangani aniqlanib, ular ashyoviy dalillar bilan qoʻlga olindi.

Xorazm viloyatidagi tezkor tadbirda Xiva shahrida muqaddam jinoyat sodir etgan N.B. fuqaro M.X.dan 15 ming AQSH dollarini 193,5 million soʻmga sotib olgan vaqtida qoʻlga tushdi. Ushbu holatda barcha mablagʻlar ashyoviy dalil sifatida olindi.

Navoiy viloyatida oʻtkazilgan tezkor tadbir davomida D.K. va boshqa shaxslar fuqaro B.K.ga 4 ming AQSH dollarini 51,8 million soʻmga sotgani aniqlandi. Ushbu noqonuniy operatsiya chogʻida ham dalillar qayd etildi va shaxslar hibsga olindi.

Jizzax viloyatidagi tezkor tadbirda valyuta ayirboshlash bilan shugʻullangan D.D. fuqaro M.A.ga 3,5 ming AQSH dollarini 45,5 million soʻmga sotgan vaqtida qoʻlga olindi. Uning faoliyati toʻxtatilib, tergov harakatlari boshlandi.

Shuningdek, Andijon viloyati Shahrixon tumanidagi “Yangi bozor” dehqon bozori hududida oʻtkazilgan tadbirda fuqaro D.B. fuqaro I.I.ga 3,2 ming AQSH dollarini 41,4 million soʻmga sotgani aniqlandi. Tadbir davomida D.B.ning oʻzidan jami 4 295 AQSH dollari va 41,8 million soʻm pul ashyoviy dalil sifatida olindi.

Hozirda ushbu holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki oʻtkazish) bilan jinoyat ishlari qoʻzgʻatildi. Barcha shaxslarga nisbatan tergov harakatlari olib borilmoqda. Huquqni muhofaza qiluvchi organlar noqonuniy valyuta ayirboshlashga qarshi kurashni davom ettirishlarini maʼlum qildilar.