Bugun yurtimizda tibbiy xizmatlar sifati va qamrovini kengaytirishga qaratilgan kompleks chora-tadbirlar amalga oshirilmoqda.

Xususan, aholiga ixtisoslashtirilgan xizmatlarni yaqinlashtirish va koʻlamini kengaytirish maqsadida:

markazlar soni 10 tadan 25 taga, ularning hududiy filiallari 2 tadan 270 taga oshirildi. Buning natijasida ushbu muassasalar tomonidan amaliyotga tatbiq qilingan yangi innovatsion usullar soni 260 tadan 2 084 taga ortdi;

teletibbiyot orqali hududlarda maslahat berilgan bemorlar soni 2020-yilda 8 952 nafarni tashkil qilgan boʻlsa, 2022-yil yakuniga koʻra, bu koʻrsatkich 25 231 nafarga yetdi;

Respublika shoshilinch tibbiy yordam ilmiy markazida 75 oʻrinli zamonaviy operatsion blok qurilib, foydalanishga topshirildi;

46 ta oilaviy shifokor punkti va 35 ta mahalla tibbiyot punkti ochildi va 250 ming nafar aholiga birlamchi tibbiyot yaqinlashtirildi.

Maʼlumot oʻrnida bugungi kunda yurtimizdagi 9 370 ta mahalladan 6 359 tasiga (67 foiz) eng yaqin tibbiyot muassasalari 3 km. gacha boʻlgan masofani tashkil qiladi.

2023-2024-yillarda qoʻshimcha 1373 ta tibbiyot muassasasini tashkil etish rejalashtirilgan. Natijada 90 foiz mahallada eng yaqin tibbiyot muassasagacha boʻlgan masofa 3 km.gacha va 10 foiz mahallada esa 5 km.gacha boʻladi.

Aytish lozimki, davlat tomonidan bepul koʻrsatiladigan “kafolatlangan tibbiy xizmatlar hajmi” eng koʻp uchrayotgan kasalliklar va murojaatlardan kelib chiqqan holda shakllantirildi.