Foto: Reuters

Isroil va HAMAS oʻt ochishni toʻxtatish boʻyicha muzokaralarni 17-mart kuni qayta boshlashi mumkin.

Isroil va Falastinning HAMAS harakati oʻrtasida oʻt ochishni toʻxtatish va garovga olinganlarni ozod qilish boʻyicha muzokaralarning kutilayotgan sanasi maʼlum boʻldi.

«Associated Press» xabariga koʻra, muzokaralar 17-mart, yakshanba kuniga belgilangan va ular Misr poytaxti Qohirada boʻlib oʻtishi kerak. Misr rasmiylarining bildirishicha, HAMAS uch bosqichli reja va Gʻazo sektorida garovda turgan 35 nafar, jumladan, ayollar, bemorlar va keksalarni ozod qilish boʻyicha taklif tayyorlagan. Ular uchun HAMAS Isroilda saqlanayotgan 350 kishini ozod qilishni talab qilmoqchi.

Manbaning yozishicha, Falastin harakati, shuningdek, 50 nafar garovga olinganlar evaziga kamida besh nafar ayol askarni ozod qilishni rejalashtirgan. Shu bilan birga, Isroil tomoni gumanitar yordam va falastinliklarning anklav shimoliga qaytishi uchun erkin foydalanish imkoniyatini yaratish uchun «ikki asosiy yoʻldan chekinishi» kerak boʻladi.

Rejaning ikkinchi bosqichida har ikki tomon ham doimiy oʻt ochishni toʻxtatish boʻyicha kelishib olishi kerak, uchinchisida esa HAMAS hozirda Falastin harakati qoʻlida boʻlgan jasadlarni topshiradi va Isroil Gʻazo blokadasini bekor qiladi.

Qayd etilishicha, muzokaralar 18-martga koʻchirilishi mumkin.