Tinchlik va osoyishtalik mamlakatda  barqaror taraqqiyotning kafolati. Shu bois  bunyodkor xalqimiz azaldan tinchlik va osoyishtalikni Vatan, ona, ozodlik kabi muqaddas tushunchalar qatorida ulugʻlab, mamlakat sarhadlari daxlsizligi  va xavfsizligi himoyachilari har doim hurmat va eʼtiborda boʻlgan.

Ayniqsa, Vatan himoyachisi degan sharafli kasbni ulugʻlab, kindik qoni tomgan yurt tuprogʻini sharaf bilan qoʻriqlayotgan  harbiylarning turmush sharoitini yaxshilash, ularning oilalarini barcha qulayliklarni oʻzida mujassam etgan uy-joy bilan taʼminlash ustuvorlik kasb etmoqda. Shu jihatdan mamlakatimiz rahbarining Oʻzbekiston Respublikasi Mudofaa vazirligi harbiy  xizmatchilari uchun  turar joylar qurish dasturi toʻgʻrisidagi qarori Vatan himoyachilari va ularning oilasiga yuksak gʻamxoʻrlikning amaliy ifodasidir.

Mazkur qaror asosida har yili Vatan himoyachilari  bayrami arafasida  harbiy xizmatchilar uchun  qurilgan uy-joylarni foydalanishga topshirish anʼanaga aylangan.  Joriy yilda ham oʻn besh nafar harbiy xizmatchi hamda Milliy gvardiya xodimlarining oʻn besh nafari  Navoiy shahridagi  18-kichik dahada oʻz xonadoniga ega boʻldilar.

— Yigirma bir yillik harbiy xizmatimda uch viloyat hududida harbiy burchimni oʻtab,  ijarada yashadik, — deydi uch xonali uyga koʻchib oʻtgan  Ulugʻbek Qoʻziyev. —  Shu oraliqda uch farzandli boʻlib, toʻngʻichlari voyaga yetib qoldi. Shu maʼnoda bugun harbiy xizmatimiz va hayotimizning eng baxtli damlaridan biridir.

— Ushbu uy bizning oilamizga  Yangi yil  shukuhi  yana bir qadrli sana – Vatan himoyachilari kuniga ulanib ketadigan qutlugʻ ayyomlarda muhtaram Prezidentimiz,  mamlakatimiz Qurolli Kuchlari Oliy bosh qoʻmondonining   munosib sovgʻasi boʻldi, — deydi Milliy gvardiya xodimi Joʻrabek Murodov. —  Biz harbiylar bu  gʻamxoʻrlikdan  ruhlanib,  oʻz ustimizda tinimsiz ishlab, siyosiy va jangovar tayyorgarligimizni oshirishda, yangi-yangi marralarni zabt etamiz. 

Tadbirda Respublikamiz  Qurolli Kuchlarining mamlakat suvereniteti va hududiy yaxlitligini saqlash,  xalqimizning tinchligi hamda bunyodkorlik mehnatini himoyalash, yosh avlodni vatanparvarlik ruhida tarbiyalashdagi ahamiyatini inobatga olib, Yurtboshimiz tomonidan koʻrsatilayotgan eʼtibor alohida taʼkidlandi.

Uylarni harbiy xizmatchilarning oilalariga topshirish tantanalarida Respublika Mudofaa vazirligi Markaziy harbiy okrug qoʻshinlari  qoʻmondoni O.Saidov, viloyat hokimi  K. Tursunov ishtirok etdi.  
Temur  ESHBOYEV
(“Xalq soʻzi”).