“Qamchiq” dovonida “Toshkent-Vodiy” yoʻnalishida harakatlangan “Cobalt” rusumli avtomobil haydovchisi boshqaruvni yoʻqotib, yoʻlning xandaq qismiga tushib ketdi. Bu haqida Favqulodda vaziyatlar vazirligi xabar berdi.

Unda aytilishicha, 21-may, chorshanba kuni soat 08:05 da A-373 “Toshkent-Oʻsh” avtomobil yoʻlining “Qamchiq” dovonidan oʻtgan qismida “Toshkent-Vodiy” yoʻnalishida harakatlangan “Cobalt” rusumli avtomobil haydovchisi boshqaruvni yoʻqotishi oqibatida yoʻlning xandaq qismiga tushib ketgan.

Mazkur holat yuzasidan “Qamchiq” maxsus-qidiruv yongʻin-qutqaruv boshqarmasiga amaliy yordam kerakligi toʻgʻrisida murojaat kelib tushgan.

Ushbu murojaatga asosan, qutqaruv otryadi aytilgan manzilga zudlik bilan yetib borib, maxsus texnika va asbob-anjomlar yordamida avtomobil xandaqdan chiqarib olingan.

Favqulodda vaziyatlar vazirligi bergan maʼlumotga koʻra, avtomobilda haydovchi va 3 nafar yoʻlovchi boʻlgan. Mazkur hodisa oqibatida tan-jarohati olganlar aniqlanmagan.

Eslatib oʻtamiz, avvalroq, 20-may kuni Surxondaryo viloyati, Denov tumani, “Istiqlol yulduzi” MFY hududidan oqib oʻtuvchi “Hazarbogʻ” kanaliga “Cobalt” rusumli avtomobil ehtiyotsizlik oqibatida tushib ketgandi. Ushbu hodisa oqibatida hech kim tan jarohati olmagan.