Botir MADIYOROV/“Xalq soʻzi”. Yurtimizda iqtidorli yoshlarni qoʻllab-quvvatlash maqsadida “Mirzo Ulugʻbek vorislari” respublika tanlovi oʻtkazib kelinmoqda. Bu yil 3162 nafar fargʻonalik yigit-qizlar tanlovda qatnashish istagini bildirib, oʻz bilimlarini sinovdan oʻtkazdi.

Viloyatda tanlovning tuman-shahar bosqichi tashkil etilib, har bir hududdan 16-25 yoshgacha navqiron avlod vakillari oʻz loyihalar bilan qatnashdi. Birinchi bosqichda 95 nafar gʻolib aniqlanib, viloyat bosqichiga yoʻllanma oldi. 25-26-aprel kunlari oʻtkazilgan viloyat bosqichida 20 nafar nomzod saralanib, respublika bosqichida ishtirok etdi.

Toshkent shahrida boʻlib oʻtgan tanlovning respublika bosqichida ishtirok etgan 20 nafar fargʻonalik yoshlarning 7 nafari gʻolib boʻldi. Ular “Ulugʻbek” jamgʻarmasi tomonidan bazaviy hisoblash miqdorining 20 barobarida bir martalik pul mukofoti bilan taqdirlandi.

— Viloyatimizda tanlov gʻoliblari alohida ragʻbatlantirildi, — deydi Fargʻona viloyati oliy taʼlim, fan va innovatsiyalar boshqarmasi boshligʻi Toʻychiboy Boymatov. — Fargʻona shahrida yangi qurib bitkazilgan Lolaxon Murotova nomidagi viloyat qishloq xoʻjaligiga ixtisoslashtirilgan kasb-hunar maktabi binosida taqdirlash marosimi oʻtkazilib, 95 nafar tuman va shahar bosqichi gʻoliblarga bazaviy hisoblash miqdorining 5 barobari, viloyat bosqichining 20 nafar gʻoliblariga bazaviy hisoblash miqdorining 10 barobari miqdorida bir martalik pul mukofotlari topshirildi.