Fargʻona viloyatida yollanishda ayblanayotgan erkak ozodlikdan mahrum etish jazosiga hukm qilindi. Bu haqda jinoyat ishlari boʻyicha Oʻzbekiston tumani sudining qarorida soʻz boradi.

Aniqlik kiritilishicha, 39 yoshli ayblanuvchi R. E. 2024-yil sentyabr oyida Rossiyaga ishlash uchun ketgan. U yerda erkak Rossiya Qurolli Kuchlari bilan shartnoma imzolagan, shundan soʻng Donesk viloyatidagi harbiy qismga yuborilgan va u yerda 2025-yil noyabr oyiga qadar xizmat qilgan.

Shartnoma muddati tugagach, u Oʻzbekistonga qaytib kelgan va huquq-tartibot idoralari xodimlari tomonidan qoʻlga olingan.

Sud majlisida erkak qurilishda ishlaganini bayon qildi. Tanishi unga haydovchilik ishini taklif qilgan. Uning soʻzlariga koʻra, u hujjatlarni mazmunini tushunmagan holda imzolagan.

Sudlanuvchi jangovar harakatlar zonasida mudofaa inshootlarini qurish va okoplar qazish bilan shugʻullanganini qayd etdi. Xizmati uchun u taxminan 2 mln rubl miqdorida mablagʻ olgan.

Sud uni Jinoyat kodeksining 154-moddasi (Yollanish) boʻyicha aybdor deb topdi va uch yil muddatga ozodlikdan mahrum qilish jazosini tayinladi.