Oʻzbekistonning turli hududlarida elektr energiyasidan noqonuniy foydalanish holatlari fosh etildi. Bosh prokuratura huzuridagi Departamentning hududiy boʻlinmalari tomonidan oʻtkazilgan tergovga qadar tekshiruv va tezkor tadbirlar natijasida bir nechta qonunbuzarlik holatlari aniqlangan.

Xususan, Departamentning Nukus shahri boʻlimi tomonidan oʻtkazilgan tergovga qadar tekshiruv davomida “T.G.” MCHJ masʼul shaxslari tomonidan Toʻrtkoʻl koʻp tarmoqli texnikumining yotoqxona binosida tijorat maqsadida elektr tarmogʻiga oʻzboshimchalik bilan ulanib, 284,1 million soʻmlik elektr energiyasidan noqonuniy foydalanganlik holati aniqlangan. Ushbu harakat natijasida davlatga katta miqdorda moddiy zarar yetkazilgan.

Shu bilan birga, Andijon shahri boʻlimi tomonidan oʻtkazilgan tezkor tadbirda fuqaro K.Ya. maishiy xizmat koʻrsatish binosida elektr tarmogʻiga noqonuniy tarzda ulanib, 217,8 million soʻmlik elektr energiyasidan foydalanganligi fosh etilgan. Ushbu holat ham elektr tarmoqlari xavfsizligi va qonuniylik tamoyillarining buzilganini koʻrsatadi.

Yana bir holatda, Dehqonobod tumani boʻlimi tomonidan oʻtkazilgan tergovga qadar tekshiruvda fuqaro M.Sh. oʻzini tadbirkor sifatida davlat roʻyxatidan oʻtkazmasdan, tegirmon faoliyatini yoʻlga qoʻygan va elektr tarmogʻiga oʻzboshimchalik bilan ulanib, jami 117,9 million soʻmlik elektr energiyasidan noqonuniy foydalangan.

Mazkur holatlar yuzasidan Oʻzbekiston Respublikasi Jinoyat kodeksining 169-moddasi (oʻgʻrilik) asosida jinoyat ishlari qoʻzgʻatilib, hozirda tergov harakatlari olib borilmoqda.