Angliya terma jamoasi va “Real Madrid” klubi futbolchisi Jud Bellingem “EA Sports FC 25” video oʻyinining muqovasidagi asosiy futbolchi boʻladi. Bu haqda kompaniyaning rasmiy sahifalarida maʼlum qilingan.

Shu tariqa “Qirollik klubi” yulduzi “EA Sports” tarixidagi global muqova yuzidan joy olayotgan eng yosh futbolchiga aylanmoqda. Ayni paytda u 21 yoshda. Muqovada Bellingem oʻtgan aprel oyida “Barselona”ga qarshi oʻyinda urgan golini nishonlayotgani tasvirlangan.

Bellingem, shuningdek, Devid Bekxem, Zinedin Zidan, Janluiji Buffon, va Aytana Bonmati kabi mashhur oʻyinchilar bilan birga oʻyinning “Ultimate Edition” muqovasida ham boʻladi. Jud oʻzining hayajonini bildirib, ushbu oʻyinni oʻynab katta boʻlganini va bir kun kelib muqovada boʻlishni orzu qilganini aytadi.

Qayd etish kerakki, u 2011-yildan beri ushbu oʻyin simulyatori muqovasidagi birinchi ingliz futbolchisi boʻladi. Oʻtgan yozda “Real Madrid”ga qoʻshilgan Bellingem oʻzining birinchi mavsumidayoq La Liga va UYEFA Chempionlar Ligasida gʻolib chiqdi. U shuningdek, Angliya terma jamoasiga “Yevro-2024” finaliga chiqishga yordam berdi.

“EA Sports FC” brendi vitse-prezidenti Devid Jekson Bellingemni isteʼdodi va fidoyiligi uchun eʼtirof etib, uning klubi va mamlakati uchun koʻrsatayotgan oʻyinlarini alohida taʼkidlagan.

Avvalroq, dunyoning eng qimmat futbol klublar reytingi eʼlon qilingandi.