— Jon Xopkins universiteti bergan maʼlumotlarga koʻra, dunyo boʻyicha koronavirusga chalinganlar soni 2,7 mln. nafardan oshdi, 193 mingdan ortiq bemor vafot etgan, 760 mingdan ziyodi tuzalgan.

— AQSHda virusni yuqtirganlar soni 870 mingdan koʻpaydi, 50 mingdan ziyod inson hayotdan koʻz yumdi.

— AQSH harbiy dengiz flotining Kidd esminetsida koronavirus tarqaldi. Kema portga qaytariladi, unga sanitarik ishlov beriladi, jamoaning bir qismi qirgʻoqda qoldiriladi.

— Ispaniyada bir sutkada 367 bemor vafot etdi. Bu 20-martdan buyon qayd etilgan eng past koʻrsatkichdir. 

— Italiyada epidemiya boshlangandan buyon tojdor virus qurbonlari sonining oʻsishi boʻyicha eng past daraja kuzatildi. Bir sutkada 420 bemor hayotdan koʻz yumgan boʻlsa, umumiy qurbonlar soni 25 969 nafarga yetdi.

— Xitoyning Xaynan hududidagi shifoxonalarda va karantinda koronavirusga chalingan birorta bemor qolmadi. Kasalxonadan ruxsat berilgan soʻnggi bemor Xubeydan kelgan ayol boʻldi.

— Parijda 11-maydan keyin jamoatchilik harakati 70 foiz qayta tiklanadi. Bungacha mamlakatda oʻzini oʻzi yakkalash rejimi amalda boʻlib turadi. Fransiyada 120 mingdan ortiq inson virusga chalingan, qariyb 22 ming bemor halok boʻldi.