Bolaning begonasi bo’lmaydi
Anjuman
Poytaxtimizda “SOS — O’zbekiston bolalar mahallalari” uyushmasi tomonidan Evropa Ittifoqi homiyligida amalga oshirilayotgan “O’zbekistonda ijtimoiy himoyaga muhtoj oilalar va bolalarning manfaatlarini ta’minlash” loyihasi taqdimoti o’tkazildi. Unda vazirlik va idoralar vakillari, davlat va xalqaro tashkilotlar, o’zini o’zi boshqarish organlari va fuqarolik jamiyati institutlari xodimlari hamda jurnalistlar ishtirok etdi.
O’zbekiston Respublikasi Bosh vazirining o’rinbosari — O’zbekiston Xotin-qizlar qo’mitasi raisi Tanzila Narbaeva, “SOS — O’zbekiston bolalar mahallalari” uyushmasi direktori Gulnoza Abidova, YUNISEFning O’zbekistondagi vakolatxonasi rahbari Sasha Graumann va boshqalar mamlakatimizda aholini ijtimoiy himoya qilishning qonuniy asosi hamda aniq mexanizmlari yaratilganini ta’kidladi. Yosh avlodning hech kimdan kam bo’lmay voyaga etishi, jahon andozalari darajasida ta’lim olishi, jamiyatimizdagi islohotlarning faol ishtirokchisiga aylanishi uchun zarur sharoitlarni yaratishga e’tibor qaratilmoqda.
“SOS — O’zbekiston bolalar mahallalari” uyushmasi tomonidan amalga oshirilayotgan loyiha yurtimizdagi muhtoj oilalarni ijtimoiy qo’llab-quvvatlash, ertamiz egalarining huquq va manfaatlarini ta’minlash borasidagi ishlarga hissa qo’shadi.
Qayd etilganidek, mazkur loyiha Toshkent shahri, Samarqand, Xorazm viloyatlarida o’tkaziladi hamda 5 mingdan ortiq oilani va 15 mingga yaqin bolalarni qamrab oladi.
Anjumanda loyihaning hayotiy ahamiyati, uni amalga oshirish mexanizmlari va kutilayotgan natijalar muhokama qilindi. Loyihada ishtirok etuvchi trenerlarni tayyorlash, ular uchun kaskad treninglar, hududlarga tanishuv safarlari o’tkazish, pilot mahallalarda qo’shma guruhlar tuzish va ularning faoliyatini monitoring qilish bo’yicha fikr-mulohzalar almashildi.
— O’zbekiston hukumatining mazkur loyihani faol qo’llab-quvvatlaganidan minnatdormiz, — deydi O’zbekiston Respublikasidagi Evropa Ittifoqi delegatsiyasi texnik hamkorlik bo’limi rahbari Ovidiu Mik. — Bolaning begonasi bo’lmaydi. Evropa Ittifoqining moliyaviy ko’magida amalga oshirilayotgan ushbu loyiha doirasida ijtimoiy himoyaga muhtoj bolalarga g’amxo’rlik ko’rsatish, ularni tibbiy-psixologik, ma’naviy jihatdan qo’llab-quvvatlash maqsad qilingan. Shu bilan birga, yosh avlodni huquqiy, ijtimoiy muhofaza qilish, innovatsion yondashuvlar asosida ularning jamiyatda o’z o’rniga ega bo’lishiga yaqindan yordamlashishga qaratilgan turli mashg’ulotlar, seminar va treninglar o’tkazish ko’zda tutilgan.
Dilshod KARIMOV,
“Xalq so’zi” muxbiri.
Izohlar
Hozircha hech kim fikr bildirmagan. Balki Siz birinchilardan bo'larsiz?
Izoh qoldirish uchun tizimga kiring